ৰাজ্যৰ প্ৰতিখন গাঁৱৰ সৰ্বস্তৰৰ মানুহৰ প্ৰকৃত উন্নয়ন সাধন কৰিবলৈ হ’লে আগন্তুক পঞ্চায়ত নিৰ্বাচনত অগপ দলক ভোট দি জয়যুক্ত কৰক। এই আহ্বান আমগুৰি সমষ্টিৰ বিধায়ক প্ৰদীপ হাজৰিকাৰ।
সমষ্টিটোৰ অধীনত গৌৰীসাগৰ উন্নয়ন খণ্ডৰ অন্তৰ্গত জকাইচুক জিলা পৰিষদৰ মোমাইতামূলী, চাৰিং, খনামূখ, হাতীঘূলী দিখৌমুখ আৰু কাৱৈমাৰী গাঁও পঞ্চায়তক সাঙুৰি মঙলবাৰে গৌৰীসাগৰত অনুষ্ঠিত হোৱা অগপৰ এখন বিশাল নিৰ্বাচনী সভাত অংশগ্ৰহণ কৰি বিধায়কগৰাকীয়ে এই মন্তব্য কৰে।
ইয়াৰ উপৰি বিধায়ক গৰাকীয়ে অগপ দলটোৰ কাৰণে পঞ্চায়ত নিৰ্বাচন অতি গুৰুত্বপূৰ্ণ বুলি মন্তব্য কৰে। বৰ্তমান অসমৰ খিলঞ্জীয়া সকলৰ ভাষা-সংস্কৃতি সকলো আজি সংকটৰ গৰাহত। যাৰ বাবে অসমৰ জনগনে অগপ দলটোক ক্ষমতালৈ অহাতো বিচাৰিছে বুলি তাৎপৰ্যপূৰ্ণ মন্তব্য আগবঢ়ায়।
অগপ দলটোৰ কেন্দ্ৰীয় সমিতিৰ সাধাৰণ পৰিষদৰ সদস্য চন্দন গগৈয়ে পৰিচালনা কৰা নিৰ্বাচনী সভাখনৰ পূৰ্বে জকাইচুক জিলা পৰিষদৰ অন্তৰ্গত প্ৰতিখন পঞ্চায়তৰ প্ৰাৰ্থীসকলে নিজ নিজ পঞ্চায়তৰ পৰা অসংখ্য দলীয় সমৰ্থকক লগত লৈ বাইক ৰেলি কৰি আহি সভাত সমবেত হয়।
জকাইচুক জিলা পৰিষদত অগপ দলটোৰ সাংগঠনিক দায়িত্বত থকা দলটোৰ ভগ্নীপ্ৰতীম সংগঠন মহিলা পৰিষদৰ কেন্দ্ৰীয় সম্পাদিকা কুইন হাজৰিকাই আদৰণি ভাষন প্ৰদান কৰাৰ লগতে আটাইকেইখন পঞ্চায়তৰ প্ৰাৰ্থীসকলক দলটোৰ হৈ প্ৰদীপ হাজৰিকাৰ লগতে বিষয়ববীয়াসকলে একোখনকৈ ফুলাম গামোচাৰে উষ্ম আদৰণি জনায়।
অন্যহাতে নিৰ্বাচনী সভাখনত সমষ্টি সমিতিৰ সভাপতি বিপুল কটকী, অগপ দলৰ জিলা প্ৰাক্তন সভাপতি ভবানী বৰুৱা, জিলা ভাৰপ্ৰাপ্ত সভাপতি জিতেন ভৰালী, ড০ অনিল গগৈকে ধৰি দলটোৰ বহু নেতা-কৰ্মীয়ে অংশগ্ৰহণ কৰে।