বায়ু প্ৰদূষণেৰে দেশৰ ভিতৰতে অন্যতম প্ৰদূষিত ৰাজ্য হিচাপে স্থান লাভ কৰিছে অসমে। একেলগে ৮ খনকৈ ফ্লাই অভাৰ নিৰ্মাণ, নলা নৰ্দমা পৰিস্কাৰ, জলজীৱন আঁচনিৰ বাবে গাঁত খন্দা, বৰ বৰ অট্টালিকা নিৰ্মাণ আদিয়ে গুৱাহাটীৰ বায়ু জলজীৱনৰ বাবে অনুপযোগী কৰি তুলিছে।
বিগত চাৰি পাঁচ মাহ ধৰি বৰষুণৰ এটা টোপালো পৰা নাই গুৱাহাটীত। ধূলিৰ প্ৰতাপত গুৱাহাটীত বৰ্তমান ঘৰৰ বাহিৰত ওলাই উশাহ ল’ব নোৱাৰা অৱস্থা। জনস্বাস্থ্যৰ প্ৰতি নামি আহিছে সাংঘাতিক ভাবুকি। বিভিন্ন ৰোগত আক্ৰান্ত হ’বলৈ ধৰিছে গুৱাহাটীৰ সাধাৰণ নাগৰিক।
গুৱাহাটী বায়ু প্ৰদূষণৰ বিষয়ে সচেতন ৰাইজ আৰু সংবাদ মাধ্যম সমূহে ইমান দিনে চিঞৰি থকাৰ পিছত এতিয়া সাৰ পাইছে মহানগৰ প্ৰশাসন। প্ৰতিদিনে আঠখনকৈ গাড়ীৰে গুৱাহাটীৰ ৰাজপথত পানী ছটিওৱাৰ সিদ্ধান্ত গ্ৰহণ কৰিছে চৰকাৰে।
দেওবাৰে সংবাদ মেল সম্বোধন কৰি এই কথা সদৰী কৰিছে গুৱাহাটী পৌৰ নিগমৰ মেয়ৰ মৃগেন শৰণীয়াই। মৃগেন শৰণীয়াই উল্লেখ কৰা মতে প্ৰতিদিনে আঠখনলৈ গাড়ীৰে গুৱাহাটীৰ ৰাস্তাত পানী ছটিয়াই ধূলি প্ৰশমনৰ চেষ্টা কৰা হ’ব।
ফায়াৰ বিগ্ৰেডেৰেও পানী ছটিওৱা হ’ব গুৱাহাটীৰ ৰাজপথত। আনকি নতুনকৈ পানীৰ স্পেয়াৰ গাড়ী কিনিবৰ বাবে চৰকাৰে ধাৰ্য কৰিছে ১৮ কোটি টকা। মেয়ৰ মৃগেন শৰণীয়াই লগতে গুৱাহাটী আৰু গুৱাহাটীৰ আশে পাশে থকা অঞ্চল সমূহৰ পাহাৰ খননত তীক্ষ্ণ নজৰ ৰখা হ’ব বুলিও মন্তব্য কৰিছে।
এতিয়া প্ৰশ্ন হয়, মাত্ৰ কেইখন মান গাড়ীৰে পানী ছটিয়ালেই গুৱাহাটীৰ পৰিৱেশ প্ৰদূষণৰ সমস্যা সমাধান হ’ব নে? ইয়াৰ দীৰ্ঘস্থায়ী সমস্যাৰ বাবে চৰকাৰে কিবা পদক্ষেপ গ্ৰহণ কৰিছেনে? বিনাশকাৰী নিৰ্মাণ তথা বিকাশ ৰোধ কৰি বহনক্ষম উন্নয়নৰ কথা চিন্তা কৰিছেনে অসম চৰকাৰ কিম্বা মহানগৰ পৌৰ সভাৰ কৰ্তৃপক্ষই?
