অসম চৰকাৰে দুৰ্নীতিৰ বিৰুদ্ধে শূন্য সহনশীলতা নীতি গ্ৰহণ কৰাৰ ফটা ঢোল পিটি থাকিলেও, টংলা-মহলীয়াপাৰা পথটোত কৰা কামত যথেষ্ট অৱহেলা দেখুৱাটো পৰিলক্ষিত হৈছে। ইমান অনুন্নত মানদণ্ডৰ সামগ্ৰী ব্যৱহাৰ কৰা গৈছে যে নিৰ্মাণৰ পাছতেই পথটোৰ ব্লেক টেপিং এৰাই গৈছে।
উল্লেখ্য যে ২০১৮ৰ ২ জুনত কলাইগাঁৱৰ বিধায়ক মহেশ্বৰ বড়ো আৰু গড়কাপ্তানি বিভাগৰ বিষয়াবৰ্গৰ উপস্থিতিত ছিপাঝাৰৰ বিধায়ক বিনন্দ কুমাৰ শইকীয়াই এই পথটোৰ আধাৰশিলা স্থাপন কৰিছিল। উল্লেখ্য যে প্ৰায় এটা দশক ধৰি এই গুৰুত্বপূৰ্ণ পথটো জৰাজীৰ্ণ অৱস্থাত আছিল।
কিন্তু, ১ কোটি টকা ব্যয়সাপেক্ষে এছঅ’পিডি (জি)-২০১৭-১৮ আঁচনিৰ অন্তৰ্গত ৪.২০ কিঃমিঃ দৈৰ্ঘ্যৰ এই পথটো মেৰামতি কৰাৰ বাবে আধাৰশিলা স্থাপন হোৱাৰ পাছত স্থানীয় বাসিন্দাসকলে আশাৰ ৰেঙনি দেখিছিল।
কিন্তু ৰাইজৰ আশাত চেঁচা পানী ঢালি ঠিকাদাৰ উমেশ বেৰিয়াই গড়কাপ্তানি বিভাগৰ এচাম অশিষ্ট বিষয়ববীয়াৰ লগ লাগি পথটোৰ গুণগত মানলৈ অৱজ্ঞা কৰি পথটোৰ নিৰ্মাণকাৰ্য সম্পূৰ্ণ কৰে। ফলত পথটো পুনৰ জৰাজীৰ্ণ হয়। নাম প্ৰকাশত অনিচ্ছুক একাংশ স্থানীয় ৰাইজে উক্ত পথটোৰ এনে নিম্ন মানৰ কামৰ সন্দৰ্ভত তীব্ৰ অসন্তুষ্টি ব্যক্ত কৰিছে।
