শ্ৰীলংকাৰ ধাৰাবাহিক বোমা বিস্ফোৰণৰ ঘটনাটোৰ নিচিনা ঘটনা নাগালেণ্ডতো সংঘটিত হোৱাৰ সম্ভাৱনা “অস্বীকাৰ কৰিব নোৱাৰি” বুলি শংকা প্ৰকাশ কৰিছে নাগালেণ্ডৰ মুখ্য সচিবে।
ঘটনাটোক সঠিক দিশৰ পৰা পৰ্য্যৱেক্ষণ কৰিবলৈ ৰাজ্যৰ আৰক্ষী প্ৰশাসনক আহ্বান জনায় মুখ্য সচিব টেমজেন টয়ে।
“গতিকে নাগালেণ্ডৰ আৰক্ষী সঞ্চালক প্ৰধানে ৰাজ্যখনত এনেকুৱা ঘটনা ৰোধ কৰিবৰ বাবে ল’ব লগীয়া প্ৰস্তুতি সন্দৰ্ভত বিশদ পৰ্য্যালোচনা কৰিব লাগে”, ৰাজ্যখনৰ আৰক্ষী সঞ্চালক প্ৰধানলৈ লিখা এখন পত্ৰত মুখ্য সচিবজনে কয়।
গোপনীয় পত্ৰখনৰ প্ৰতিলিপি ৰাজ্যখনৰ গৃহ আয়ুক্ত, আছাম ৰাইফলছ (উত্তৰ)ৰ মহা পৰিদৰ্শক, আৰু এছ আই বি, নাগালেণ্ডৰ যুটীয়া সঞ্চালকলৈও প্ৰেৰণ কৰা হয়।
“তাৰোপৰি জনসাধাৰণক এই সম্পৰ্কত সজাগ কৰিবলৈও কৰ্ম আঁচনি প্ৰস্তুত কৰিব পাৰি” পত্ৰখনত কোৱা হৈছে।
তেওঁ লগতে বিষয়টো অচিৰেই ছিকিউৰিটি ক’অ’ৰডিনেশ্যন মিটিঙত আলোচনা কৰা হ’ব বুলি পত্ৰখনত উল্লেখ কৰে।
উল্লেখযোগ্য যে একাধিক গীৰ্জা আৰু হোটেলত ২১ এপ্ৰিলত হোৱা ভয়ংকৰ বিস্ফোৰণলানিত ৮টাকৈ বোমাৰ বিস্ফোৰণ ঘটোৱা হৈছিল। প্ৰায় ৩০০জন লোক আক্ৰমণটোত নিহয় হয়।
