ক’ভিড মহামাৰী প্ৰতিৰোধী অভিযানত কিমান টকা খৰচ হ’ল আৰু ক’ত ক’ত খৰচ হ’ল, তাৰ বিস্তৃত তথ্য সম্বলিত শ্বেতপত্ৰ প্ৰকাশ কৰাৰ দাবী তুলিছে অসম জাতীয় পৰিষদে৷
শুকুৰবাৰে দলৰ কাৰ্যালয়ত আয়োজিত এখন সংবাদমেলত সাধাৰণ সম্পাদক জগদীশ ভূঞাই কয় “ক’ভিড মহামাৰী প্ৰতিৰোধৰ হেতু ৰাজ্য চৰকাৰৰ ফালৰ পৰা বিভিন্ন বয়-বস্তু ক্ৰয় কৰাৰ বাবদ ব্যাপক কেলেংকাৰী সংঘটিত হোৱাৰ তথ্য পোহৰলৈ আহিছে৷ সেয়ে বিষয়টোৰ উচ্চ পৰ্যায়ৰ তদন্ত হ’ব লাগে৷”
কেন্দ্ৰীয় তদন্তকাৰী সংস্থাৰ দ্বাৰা তদন্ত বিচাৰি দলে ভাৰতৰ প্ৰধানমন্ত্ৰী আৰু কেন্দ্ৰীয় স্বাস্থ্য মন্ত্ৰীলৈ স্মাৰকপত্ৰ প্ৰেৰণ কৰিব বুলিও ভূঞাই প্ৰকাশ কৰে৷
কেলেংকাৰীৰ বৰ্ণনা দি সাধাৰণ সম্পাদকগৰাকীয়ে সংবাদ মেলত কয় “২০২০ চনৰ ১৫ এপ্ৰিলৰ দিনা চীনৰ পৰা ৫০ হাজাৰ পি পি ই কিট লৈ অহা ব্লু ডাৰ্ট কুৰিয়াৰ ছাৰ্ভিছৰ এখন কাৰ্গো বিমানক আদৰিবলৈ অসমৰ বৰ্তমানৰ মুখ্যমন্ত্ৰী আৰু তেতিয়াৰ স্বাস্থ্যমন্ত্ৰী ড° হিমন্ত বিশ্ব শৰ্মা লোকপ্ৰিয় গোপীনাথ বৰদলৈ বিমান বন্দৰত উপস্থিত হৈছিল৷ উক্ত বিমানখনত ৫০ হাজাৰ পি পি ই কিট আৰু অন্যান্য কোভিড প্ৰতিৰোধী সামগ্ৰী ৰাজ্য চৰকাৰে চীনৰ পৰা আমদানি কৰা বুলি উল্লেখ কৰি ড°শৰ্মাই কৈছিল যে চীনৰ পৰা পোনপটীয়াকৈ পি পি ই কিট ক্ৰয় কৰা অসম হৈছে ভাৰতৰ প্ৰথম ৰাজ্য৷
কিন্তু শেহতীয়াভাৱে ৰাষ্ট্ৰীয় স্বাস্থ্য অভিযান, অসমে (এন এইচ এম) এখন আৰ টি আই আৱেদনৰ উত্তৰত জনায় যে অসমত চৰকাৰীভাৱে চীনৰ পৰা কোনো ধৰণৰ পি পি ই কিট বা অন্য ক’ভিড প্ৰতিৰোধী সামগ্ৰী ক্ৰয় কৰা হোৱা নাছিল৷
তেতিয়াহ’লে ১৫ এপ্ৰিল ২০২০ তাৰিখে বৰ্তমানৰ মুখ্যমন্ত্ৰীয়ে ৰাজ্যৰ স্বাস্থ্যমন্ত্ৰী হিচাপে বিমানবন্দৰত দিয়া বক্তব্যটো সত্য নে ৰাষ্ট্ৰীয় স্বাস্থ্য অভিযান, অসমে আৰ টি আই আৱেদনৰ উত্তৰত কোৱা কথাখিনি সত্য? কোনোবা এটা পক্ষইতো অসত্য কথা কৈছে? কোনে কৈছে – ডঃ শৰ্মাই নে এন এইচ এমে?”
ভূঞাৰ মতে, ক’ভিড প্ৰতিৰোধী অভিযান কালত যি চৰকাৰী ধন ব্যয় কৰা হৈছিল, তাত ব্যাপক কেলেংকাৰী সংঘটিত হৈছিল৷ বিশেষকৈ চেনিটাইজাৰ ক্ৰয় আৰু যোগান, হাস্পতালসমূহলৈ যোগান ধৰা খাদ্য, দৰৱ তথা অন্য আচবাব ক্ৰয় আৰু যোগান আদিৰ ক্ষেত্ৰত ব্যাপক বিত্তীয় অনিয়ম সংঘটিত হৈছিল৷
উক্ত অনিয়মৰ তদন্ত কোনোবা কেন্দ্ৰীয় অনুসন্ধানকাৰী সংস্থাৰ দ্বাৰা কৰোৱাৰ দাবীৰে ভাৰতৰ প্ৰধানমন্ত্ৰী আৰু কেন্দ্ৰীয় স্বাস্থ্যমন্ত্ৰীলৈ অসম জাতীয় পৰিষদে স্মাৰকপত্ৰ প্ৰেৰণৰ সিদ্ধান্ত লোৱা বুলি উল্লেখ কৰি ভূঞাই কোভিড প্ৰতিৰোধৰ বাবত কি কি বয়-বস্তূ ক’ৰ ক’ৰ পৰা ক্ৰয় কৰা হৈছিল আৰু তাৰ বাবত কাক কিমান টকা আদায় দিয়া হৈছিল, এই সকলো তথ্য সামৰি শ্বেতপত্ৰ প্ৰকাশৰো দাবী উত্থাপন কৰে৷
