প্ৰতাপ জ্যোতি সন্দিকৈক গুৱাহাটী বিশ্ববিদ্যালয়ৰ নতুন উপাচাৰ্য নিযুক্তি
অসমৰ ৰাজ্যপাল তথা গুৱাহাটী বিশ্ববিদ্যালয়ৰ আচাৰ্য জগদীশ মুখীয়ে আজি অধ্যাপক প্ৰতাপ জ্যোতি সন্দিকৈক গুৱাহাটী বিশ্ববিদ্যালয়ৰ উপাচাৰ্য ৰূপে নিযুক্তি প্ৰদান কৰে।
গুৱাহাটী বিশ্ববিদ্যালয় আইন,১৯৪৭ ৰ সংশোধনী অনুসৰি তেওঁ পাঁচ বছৰলৈ অথবা তেওঁৰ বয়স ৭০ বছৰ নোহোৱালৈকৈ (যিটো নিয়ম অনুসৰি পূৰ্বে হয়) কাৰ্য্যনিৰ্বাহ কৰিব।
উল্লেখ্য যে প্ৰতাপ জ্যোতি সন্দিকৈ গুৱাহাটী বিশ্ববিদ্যালয়ৰে বায়’ টেকন’লজি বিভাগৰ অধ্যাপক।
বিশ্ববিদ্যালয়খনৰ বৰ্তমানৰ উপাচাৰ্য মৃদুল হাজৰিকাৰ কাৰ্যকাল অন্ত পৰাত ৰাজ্যপাল গৰাকীয়ে প্ৰতাপ জ্যোতি সন্দিকৈক নিযুক্তি প্ৰদান কৰে।
উল্লেখ্য যে ১৯৪৮ চনত স্থাপিত হোৱা গুৱাহাটী বিশ্ববিদ্যালয়ৰ প্ৰথম গৰাকী উপাচাৰ্য হিচাপে দায়িত্ব পালন কৰিছিল কৃষ্ণ কান্ত সন্দিকৈয়ে।