ৰাজ্যখনৰ প্ৰাথমিক শিক্ষা আৰু শিক্ষকৰ নানা সমস্যাক লৈ আজি ৰাজভৱনত ৰাজ্যপাল অধ্যাপক জগদীশ মুখীক সাক্ষাৎ কৰিব অসম ৰাজ্যিক প্ৰাথমিক শিক্ষক সন্মিলনীয়ে।
শিক্ষক সন্মিলনীৰ সাধাৰণ সম্পাদক ৰাতুল চন্দ্ৰ গোস্বামীয়ে জানিবলৈ দিয়া মতে, আজি দিনৰ ১১ বজাত সন্মিলনীৰ এক প্ৰতিনিধি দলে ৰাজ্যপালক সাক্ষাৎ কৰি বিভিন্ন সমস্যা সম্পৰ্কত আলোচনা কৰিব আৰু সন্মিলনীয়ে দীৰ্ঘদিনৰ পৰা অভিযোগ উত্থাপন কৰি অহা সমস্যাসমূহ সমাধানৰ ক্ষেত্ৰত ৰাজ্যপালৰ হস্তক্ষেপ বিচাৰিব।
উল্লেখযোগ্য যে প্ৰাথমিক শিক্ষকৰ দাবীসমূহৰ ক্ষেত্ৰত বিভাগীয় কাৰ্যালয়ত ক্ষিপ্ৰতাৰে কাম আগবঢ়া বুলি আশ্বস্ত হৈ সন্মিলনীয়ে ১৬ আগষ্টৰ পৰা ঘোষিত আন্দোলনৰ কাৰ্যসূচী ৩১ আগষ্টলৈ স্থগিত ৰাখিছিল।
সন্মিলনীৰ সভাপতি জীৱন বৰা আৰু সম্পাদক ৰাতুল গোস্বামীয়ে জানিব দিয়া মতে শিক্ষা আয়ুক্তৰ অনুৰোধ ৰক্ষা কৰি অহা ৩১ আগষ্টলৈ ঘোষিত সকলো আন্দোলনৰ কাৰ্যসূচী স্থগিত ৰখাৰ বাবে সিদ্ধান্ত গ্ৰহণ কৰিছিল।
তেওঁলোকে জানিবলৈ দিছিল যে প্ৰধান শিক্ষকৰ পদ, স্নাতক শিক্ষকৰ গ্ৰেড পে’সহ অন্যান্য দাবীসমূহৰ ভিত্তিত শিক্ষা আয়ুক্ত কাৰ্যালয় আৰু বিত্ত বিভাগত চলি থকা ফাইলৰ কামসমূহ ক্ষিপ্ৰতাৰে আগবঢ়াই নিয়াৰ স্বাৰ্থত শিক্ষা আয়ুক্তই ১৬ আগষ্টৰ পৰা ঘোষণা কৰা কাৰ্যসূচী স্থগিত ৰখাৰ বাবে অনুৰোধ জনাইছিল।
আনহাতে, আজি ৰাজ্যপালক সাক্ষাৎ কৰি সন্মিলনীয়ে কি বক্তৱ্য দাঙি ধৰে আৰু ৰাজ্যপালে তেওঁলোকৰ সমস্যা তথা দাবীসমূহৰ প্ৰতি কেনে সঁহাৰি জনায় তালৈ ৰাজ্যখনৰ সমস্যাৰে ভাৰাক্ৰান্ত প্ৰাথমিক শিক্ষকসকলে আগ্ৰহেৰে অপেক্ষা কৰিছে।
