ৰাজ্যৰ সৰ্বত্ৰে নাগৰিকত্ব (সংশোধন) আইনৰ বিৰুদ্ধে তীব্ৰ প্ৰতিবাদ তথা বিভিন্ন কাৰ্য্যসূচী চলি থকাৰ মাজতে খেল’ ইণ্ডিয়া যুথ গেমছত এগৰাকী কিশোৰীয়ে চাৰিটাকৈ সোণৰ পদক লাভ কৰিবলৈ সক্ষম হয়।
খেল’ ইণ্ডিয়াৰ জৰিয়তে ত্ৰিপুৰাৰ নাম উজলাইছে প্ৰতিভাসম্পন্ন কিশোৰী প্ৰিয়ংকা দাসগুপ্তাই। নিজৰ দৰিদ্ৰতাকো নেওচি সাহসেৰে যুঁজি গুৱাহাটীত অনুষ্ঠিত খেল’ ইণ্ডিয়া যুথ গেমছত ১৭ বছৰ অনূৰ্ধ্বৰ জিমনাষ্টিকত চাৰিটাকৈ সোণৰ পদক লাভ কৰিবলৈ সক্ষম হয় প্ৰিয়ংকা।
ত্ৰিপুৰাৰ আগৰতলাৰ জীয়ৰী প্ৰিয়ংকাই জিমনাষ্টিকত চাৰিটাকৈ সোণৰ পদক লাভেৰে এক অভিলেখ সৃষ্টি কৰিছে।
উল্লেখযোগ্য যে ত্ৰিপুৰাৰ মন্টু দেৱনাথ, কল্পনা দেৱনাথ আৰু দীপা কৰ্মকাৰে ইতিমধ্যে পূৰ্বোত্তৰৰ ৰাজ্যখনৰ পৰা অৰ্জুন বঁটা লাভ কৰিছে। সেয়ে তেওঁলোকক অনুসৰণ কৰিয়েই ২০২৪ৰ অলিম্পিকৰ পদকৰ সপোন দেখিছে প্ৰিয়ংকাই।
অলিম্পিকৰ সপোন বাস্তৱত ৰূপায়ণ কৰাৰ বাবে নিতৌ প্ৰায় সাত ঘণ্টা সময় অনুশীলন চলায় প্ৰিয়ংকাই।
