নাগৰিকত্ব (সংশোধন) আইনৰ বিৰুদ্ধে শিৱসাগৰত অব্যাহত আছে প্ৰতিবাদ
সমগ্ৰ ৰাজ্যৰ লগতে শিৱসাগৰতো কা’ৰ বিৰুদ্ধে তীব্ৰ প্ৰতিবাদ অব্যাহত আছে। দল-সংঠনৰ লগতে স্বতঃস্ফুৰ্তভাৱে ৰাইজ নাগৰিকত্ব (সংশোধন) আইনৰ প্ৰতিবাদ কৰিবলৈ ওলাই আহে। সকলোৰে মুখত এটাই কথা আমাক কা’ নালাগে।
আজি শিৱসাগৰ জিলা প্ৰশাসনৰ কৰ্মচাৰী সন্থাই কা’ৰ বিৰুদ্ধে কৰ্মবিৰতি পালন কৰি ৰাজপথলৈ ওলাই আহে। শিৱসাগৰ জিলা প্ৰশাসনৰ কৰ্মচাৰী সকলে শিৱসাগৰ জিলা উপায়ুক্তৰ কাৰ্যালয়ৰ সন্মুখত ধৰ্ণা কাৰ্যসূচী ৰূপায়ণ কৰে।
ইফালে বৃহত্তৰ অসমীয়া যুৱ মঞ্চৰ মহিলা সমিতিয়ে নাগৰিকত্ব সংশোধনী আইনৰ বিৰুদ্ধে চহৰৰ বৰ্ডিং খেল পথাৰৰ পৰা এক বৃহৎ সমদল কৰি সমগ্ৰ নগৰ পৰিভ্ৰমণ কৰি কা’ৰ বিৰুদ্ধে ৰাইজক সজাগ কৰে।
ইয়াৰ উপৰি শিৱসাগৰ চৰকাৰী উচ্চতৰ মাধ্যমিক বহুমূখী বিদ্যালয়ৰ বৰ্তমানৰ ছাত্ৰ-ছাত্ৰী আৰু প্ৰাক্তন ছাত্ৰই নগৰখনৰ দ’লমুখ চাৰিআলিত থকা ভূপেন হাজৰিকাৰ প্ৰতিমূৰ্তিৰ সন্মুখত মৌন প্ৰতিবাদ জনায়।
শিৱসাগৰত প্ৰতিদিনাই কা’ৰ বিৰুদ্ধে ৰাইজ তথা দল-সংগঠন ওলাই অহা দেখা গৈছে। সম্পূৰ্ণ শান্তিপূৰ্ণভাৱে শিৱসাগৰত কা’ৰ বিৰুদ্ধে প্ৰতিবাদ অব্যাহত আছে।