ভাৰতৰ অৰ্থনীতি বৰ্তমান বিশ্বৰ সৰ্ববৃহৎ দহটা (সুব্ৰমনিয়ন স্বামীৰ মতে ক্ৰয় ক্ষমতাৰ ভিত্তিত তৃতীয়) ব্যৱস্থাৰ এটা হ’লেও মানৱ উন্নয়নত দেশখন যুদ্ধবিধ্বস্ত ইৰাক বা লিবিয়াতকৈও পিছপৰা (ৰাষ্ট্ৰ সংঘৰ হিউমেন দিভেলপমেন্ত ৰিপ’ৰ্ট, ২০১৮ সূচীত স্থান ১৩০, মানৱ উন্নয়নৰ দিশত প্ৰথম স্থানৰ নৰৱে’ জি দি পিৰ হিচাপত ৰাষ্ট্ৰ সংঘৰ ২৮সংখ্যক দেশ, একে হিচাপত ভাৰতৰ স্থান ২০১৭ চনত আছিল সপ্তম)।
আয়ৰ অভাৱনীয় কিন্তু বাস্তৱ অসমতা আৰু বিনামূলীয়া স্বাস্থ্যসেৱাৰ দৰে (যেনে বৃটনৰ এন এইচ এচ) সামাজিক সুৰক্ষাৰ অভাৱৰ মাজতো আজিও দুৰ্দশাগ্ৰস্ত মানুহক সহায় কৰিবলৈ ওলাই আহে অসমৰ সমাজ।
তাৰেই আৰু এটা দৃষ্টান্ত দাঙি ধৰি শিৱসাগৰৰ তপন শইকীয়া নামৰ যুৱক এজনৰ চিকিৎসাৰ বাবে আৰ্থিক সাহায্য বিচাৰি ৰাজপথলৈ ওলাই আহিল বীৰ লাচিত সেনা, জুবিন ফেন ক্লাৱ, বন্ধুবৰ্গ তথা স্থানীয় ৰাইজ।
অতি অমায়িক স্বভাৱৰ লগতে সদায় হাঁহি ধেমালী কৰি ভাল পোৱা তপনে সকলোকে কম সময়ৰ ভিতৰত আপোন কৰিব পাৰিছিল। কিন্তু হঠাৎ তপনৰ জীৱনলৈ নামি আহিল অমানিশা।
শিৱসাগৰ চহৰৰ সমীপৰ জুলা গাঁৱৰ নিবাসী তথা অৱসৰ প্ৰাপ্ত শিক্ষক অমূল্য শইকীয়াৰ পুত্ৰ তপন শইকীয়াই কিছুদিন পূৰ্বে সামান্য পেটৰ বিষ অনুভৱ কৰাত চিকিৎসকৰ ওচৰ চাপে। চিকিৎসকৰ পৰামৰ্শ গ্ৰহণ কৰি আৰোগ্য লাভ নকৰাত উন্নত চিকিৎসাৰ বাবে ডিব্ৰুগড়লৈ যায়। ডিব্ৰুগড়ত চিকিৎসকে পৰীক্ষা নিৰীক্ষা কৰি তপনৰ দুয়োটা কিডনী বিকল হোৱা বুলি জনায় আৰু অতি সোনকালো উন্নত চিকিৎসাৰ বাবে অসমৰ বাহিৰলৈ যাবলৈ পৰামৰ্শ আগবঢ়ায়।
কিন্তু আৰ্থিকভাৱে দূৰ্বল তপনৰ পৰিয়ালে ততালিকে তপনক অসমৰ বাহিৰলৈ চিকিৎসাৰ বাবে নিব পৰা নাই। বৰ্তমান তপন শইকীয়াক গুৱাহাটীৰ হেলথ চিটি চিকিৎসালয়ত ভৰ্তি কৰি চিকিৎসা কৰি থকা হৈছে। জানিব পৰা মতে তপনৰ মাতৃয়ে নিজৰ পুত্ৰক এটা কিডনী দান কৰিব যদিও কিডনী Transplant কৰাৰ খৰচ ব্যয়বহুল হোৱাৰ বাবে টকাৰ অভাৱত উন্নত চিকিৎসাৰ বাবে অসমৰ বাহিৰলৈ নিব পৰা নাই তপনক।
তপনক সহায়ৰ বাবে ওলাই আহিছে বীৰ লাচিত সেনা শিৱসাগৰ জিলা সমিতি, জুবিন ফেন ক্লাৱ, তপনৰ বন্ধুবৰ্গ আৰু স্থানীয় ৰাইজ। শুকুৰবাৰে দিনৰ ২ বজাত জয়সাগৰ তিনিআলিৰ পৰা পদ যাত্ৰা কৰি ৰংঘৰ চাৰি আলি হৈ শিৱসাগৰ চহৰৰ বিভিন্ন স্থানত আৰ্থিক সাহাৰ্য্য বিচাৰে তপনৰ বাবে। দল সংগঠন তথা ৰাইজৰ অনুৰোধত তপনৰ চিকিৎসাৰ বাবে বহুজনে প্ৰদান কৰে আৰ্থিক সাহাৰ্য্য।
নিজৰ দুয়োটা কিডনী বিলক বুলি জানিও ভাগি পৰা নাই তপন শইকীয়া। জীয়াই থকাৰ অলেশ সপোন আছে তপনৰ। “আপুনি মই অলপ সহায় কৰিলে হয়টো তপন পুনৰ সুস্থ হৈ উঠিব। পূৰ্বৰ দৰেই হাঁহিব, ধেমালী কৰিব তপনে”। এই মন্তব্য কৰে বীৰ লাচিত সেনাৰ সভাপতি চিতু বৰুৱা আৰু জুবিন ফেন ক্লাৱৰ ঋষিকেশ দুৱৰাই।
তপনক যদি কোনো সদাশয় ব্যক্তিয়ে আৰ্থিক সহায় কৰিব বিচাৰে তেন্তে তলৰ বেংক একাউণ্টত নিজ ইচ্ছানুসৰি আৰ্থিক সহায় আগবঢ়াব পাৰে।
