নাগা জাতীয় সেৱা (Naga National Service)ত আজীৱন সেৱা আগবঢ়াই ৯০ বছৰ বয়সত শেষ নিশ্বাস ত্যাগ কৰা এন এচ চি এন (আই এম)ৰ চৰকাৰৰ উপাধ্যক্ষ, অৱসৰপ্ৰাপ্ত জেনেৰেল খ’লি কন্যাকক অসংখ্য গুণমুগ্ধ আৰু সতীৰ্থই শুকুৰবাৰে ডিমাপুৰত জ্ঞাপন কৰে বিদায় সম্ভাষণ।
অৱসৰপ্ৰাপ্ত জেনেৰেলজনৰ বিদায় সভাত একগোট হয়হি অভ্যন্তৰীণ গোষ্ঠীগত শত্ৰুতা আৰু একে সময়তে দৃঢ়, চিৰকলীয়া জাতীয় ঐক্যৰ বাবে জনাজাত নাগাসকলৰ বিভিন্ন জাতীয় মঞ্চ। নাগালেণ্ড চৰকাৰৰ লগতে বিৰোধী এন পি এফৰ মুৰব্বী তথা প্ৰাক্তন মুখ্য মন্ত্ৰী তি আৰ জেলিয়াঙেও সভাখনত বিদ্ৰোহী নেতাজনলৈ শ্ৰদ্ধাঞ্জলি জ্ঞাপন কৰে।
“তেওঁ শেষ মুহূৰ্তলৈকে নিজৰ মতত অবিচল থাকিল,” ১৯৫৬ চনৰ পৰা আমৃত্যু নাগা জাতীয় সেৱাৰ বিভিন্ন দায়িত্ব পালন কৰা উপাধ্যক্ষ কন্যাকৰ মৃত্যুত এইদৰে শ্ৰদ্ধাঞ্জলি জনালে এন এচ চি এন (আই এম)এ।
এন এচ চি এন (আই এম)ৰ নাগালিম জন গণতান্ত্ৰিক চৰকাৰ (Government of the People’s Republic of Nagalim)ৰ সহযোগত সভাখন আয়োজন কৰিছিল নাগা হোহো আৰু নাগা কাউন্সিলে।
লগতে পঢ়ক– ‘মৰমেৰে সুঁৱৰিম আমি’, খ’লি কন্যাকৰ মৃত্যুত আলফা (স্বাঃ) সেনাপ্ৰধান পৰেশ
কন্যাকৰ মৃতদেহ নতুন দিল্লীৰ পৰা শুকুৰবাৰে ডিমাপুৰত আহি পোৱাৰ পিছতে তেওঁলৈ শ্ৰদ্ধা জ্ঞাপনৰ উদ্দেশ্যে চহৰখনৰ এগ্ৰি এক্সপ’ ফিল্ডত ৰাজহুৱা অনুষ্ঠানটোৰ আয়োজন কৰিছিল নাগা জাতীয় সংগঠনসমূহে।
নতুন দিল্লীৰ নাগালেণ্ড হাউছতো বিদ্ৰোহী নেতাজনলৈ শ্ৰদ্ধাঞ্জলি জনাই ১৩ ডিচেম্বৰত এক অনুষ্ঠানৰ আয়োজন কৰিছিল নাগা সমাজে। নাগালেণ্ডৰ মুখ্য মন্ত্ৰী নেইফিঅ’ ৰিঅ’, নাগা শান্তি আলোচনাৰ মধ্যস্থতাকাৰী, ভাৰতৰ চোৰাংচোৱা বিষয়া আৰ এন ৰৱিয়েও অনুষ্ঠানটোত কন্যাকলৈ বিদায় সম্ভাষণ জ্ঞাপন কৰিছিল।
১৯২৮ চনত নাগালেণ্ডৰ ৱাংচু গাঁৱত জন্ম লোৱা খ’লিক অন্যতম বৃহৎ নাগা গোষ্ঠী কন্যাকসকলৰ সৰ্বোচ্চ নেতা বুলি মান্যতা দিয়া হৈছিল।
২০১৭ চনৰ মাৰ্চত ৮৯ বছৰীয়া কন্যাকক আৰু ৬টা বছৰৰ বাবে উপাধ্যক্ষৰূপে দায়িত্ব দিছিল এন এচ চি এন (আই এম)ৰ সাধাৰণ পৰিষদে।
এসময়ৰ অবিভক্ত এন এচ চি এনৰ সেনাপ্ৰধান খ’লি কন্যাক সংগঠনটো বিভক্ত হোৱাৰ পিছত ১৯৮৮ চনত খাপলাং-পন্থীৰ উপাধ্যক্ষ পদত অধিস্থিত হৈছিল।
২০১১ চনত এন এচ চি এন (কে)ৰ পৰাও ফালৰি কাটি আহি কন্যাকে এন এচ চি এন (ইউ) গঠন কৰিছিল। কিন্তু তেওঁ আই এম-গোটলৈ উভটি আহি ২০১৬ চনৰ ১৯ মে’ত সংগঠনটোৰ উপাধ্যক্ষৰূপে দায়িত্ব গ্ৰহণ কৰিছিল।
যোৱা ১২ ডিচেম্বৰত নতুন দিল্লীত ষ্ট্ৰ’কত আক্ৰান্ত হৈ চিকিৎসাধীন অৱস্থাত ফৰ্তিছ হস্পিতেলত মৃত্যু হৈছিল অৱসৰপ্ৰাপ্ত নাগা জেনেৰেলজনৰ।
