ৰাজনৈতিক নেতা তথা মন্ত্ৰী-বিধায়কৰ বিৰুদ্ধে বিভিন্ন সময়ত সততে দুৰ্নীতিৰ অভিযোগ উত্থাপন হয়। কিন্তু ক্ষমতাৰ বলত এনে অভিযুক্ত নেতা, মন্ত্ৰী-বিধায়কসকল কোনো সমস্যাৰ সন্মুখীন নহয়।
কিন্তু এনে ঘটনাৰ ক্ষেত্ৰত এক নজিৰ সৃষ্টি কৰি নিজ মন্ত্ৰীসভাৰ স্বাস্থ্যমন্ত্ৰীকে নিলম্বন কৰি আলোড়নৰ সৃষ্টি কৰিছে পঞ্জাৱৰ মুখ্যমন্ত্ৰী ভগৱন্ত মানে।
পঞ্জাৱৰ মুখ্যমন্ত্ৰী ভগৱন্ত মানে আজি নিজ কেবিনেটৰ স্বাস্থ্য মন্ত্ৰী বিজয় চিংলাৰ বিৰুদ্ধে দুৰ্নীতিৰ অভিযোগত দৃঢ় প্ৰমাণ পোৱাৰ পিছতে মন্ত্ৰীসভাৰ পৰা বৰ্খাস্ত কৰে।
স্বাস্থ্যমন্ত্ৰী চিংলাই চৰকাৰী নিবিদাৰ ওপৰত এক শতাংশ কমিছন দাবী কৰিছিল বুলি অভিযোগ উত্থাপন হৈছিল। ১০ দিন পূৰ্বে মন্ত্ৰীজনৰ বিৰুদ্ধে এই অভিযোগ লাভ কৰিছিল মুখ্যমন্ত্ৰী মানে।
ইয়াৰ পিছতে প্ৰাথমিক অনুসন্ধানত চিংলাৰ বিৰুদ্ধে উত্থাপিত অভিযোগৰ প্ৰমাণ লাভ কৰি মুখ্যমন্ত্ৰী মানে স্বাস্থ্যমন্ত্ৰীগৰাকীক অপসাৰণ কৰে। অপসাৰণৰ পিছতে পঞ্জাৱ আৰক্ষীৰ দুৰ্নীতি বিৰোধী শাখাই চিংলাক গ্ৰেপ্তাৰ কৰে।
উল্লেখ্য যে দেশৰ ইতিহাসত দ্বিতীয়বাৰৰ বাবে কোনো এজন মুখ্যমন্ত্ৰীয়ে নিজ কেবিনেট মন্ত্ৰীৰ বিৰুদ্ধে এনে কঠোৰ ব্যৱস্থা গ্ৰহণ কৰিছে। ইয়াৰ পূৰ্বে আম আদমী পাৰ্টিৰ আহ্বায়ক আৰু দিল্লীৰ মুখ্যমন্ত্ৰী অৰবিন্দ কেজৰিৱালে ২০১৫ চনত দুৰ্নীতিৰ অভিযোগত তেওঁৰ এজন মন্ত্ৰীক বৰ্খাস্ত কৰিছিল।
এজন চৰকাৰী বিষয়াই ১০ দিন আগতে মুখ্যমন্ত্ৰীৰ কাৰ্যালয়ত চিংলাৰ দুৰ্নীতিৰ বিষয়ে অভিযোগ কৰিছিল। মুখ্যমন্ত্ৰীয়ে ব্যক্তিগতভাৱে বিষয়াজনক বিহিত ব্যৱস্থা গ্ৰহণৰ আশ্বাস দিয়ে।
পঞ্জাৱৰ মুখ্যমন্ত্ৰী হিচাপে নিৰ্বাচিত হোৱাৰ পাছতে ভগৱন্ত মানে দুৰ্নীতিৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি ঘোষণা কৰিছিল। এই প্ৰতিশ্ৰুতি পুনৰ দোহাৰি মানে এক ভিডিঅ’ বাৰ্তাযোগে যে “এক শতাংশ দুৰ্নীতিও সহ্য কৰা নহ’ব” বুলি উল্লেখ কৰে।
“ৰাইজে যথেষ্ট আশাৰে আপ চৰকাৰক ভোট দিছে, আমি এই আস্থাক সন্মান কৰিব লাগিব। যেতিয়ালৈকে ভাৰত মাতৃৰ অৰবিন্দ কেজৰিৱালৰ দৰে পুত্ৰ আৰু ভগৱন্ত মানৰ দৰে সৈনিক আছে, তেতিয়ালৈকে দুৰ্নীতিৰ বিৰুদ্ধে মহাযুদ্ধ অব্যাহত থাকিব।”- মানে কয়।
আনহাতে মানৰ এই পদক্ষেপৰ পাছতে কেজৰিৱালে ভগৱন্ত মানক প্ৰশংসা কৰে। এক টুইটযোগে তেওঁ সমগ্ৰ ৰাষ্ট্ৰই আজি আপক লৈ গৌৰৱান্বিত অনুভৱ কৰিছে বুলি মন্তব্য কৰে।
