ভাৰত জোড়ো যাত্ৰাৰ মাজতে ৰাহুল গান্ধীলৈ বিবাহৰ প্ৰস্তাৱ! কোনে দিলে এই প্ৰস্তাৱ!

যোৱা ৭ ছেপ্টেম্বৰত আৰম্ভ কৰা কংগ্ৰেছৰ বহু প্ৰত্যাশিত ‘ভাৰত জোড়ো যাত্ৰা’-ই আজি পঞ্চম দিনত ভৰি দিলে। দলটোৰ প্ৰতি জনসাধাৰণৰ হেৰুওৱা বিশ্বাস ঘূৰাই অনা তথা দেশৰ জনসাধাৰণৰ সৈতে এক সম্পৰ্ক গঢ়ি তোলাৰ লক্ষ্যৰে যোৱা বৃহস্পতিবাৰৰ পৰা পদযাত্ৰা আৰম্ভ কৰিছে ৰাহুল গান্ধীসহ কেইবাগৰাকীও কংগ্ৰেছ নেতৃত্বই।

তামিলনাডুৰ পৰা আৰম্ভ হৈ কাশ্মীৰত সমাপ্তি ঘটিবলগীয়া ১৫০ দিনীয়া এই ৩,৫০০ কিলোমিটাৰৰো অধিক দৈৰ্ঘ্যৰ এই যাত্ৰাৰ মাজতে কালি কংগ্ৰেছৰ শীৰ্ষ নেতা গান্ধীয়ে বিবাহৰ প্ৰস্তাৱ লাভ কৰিছে।

প্ৰাক্তন কেন্দ্ৰীয় মন্ত্ৰী তথা কংগ্ৰেছৰ জেষ্ঠ নেতা জয়ৰাম ৰমেশে এই টুইট যোগে গান্ধীয়ে লাভ কৰা এই প্ৰস্তাৱৰ বিষয়ে সদৰী কৰিছে। টুইটটোত তেওঁ এই প্ৰস্তাৱৰ বিষয়ে উল্লেখ কৰি লিখিছে, “ভাৰত জোড়ো যাত্ৰাৰ তৃতীয় দিনা এক অদ্ভুত মুহূৰ্ত।”

জয়ৰাম ৰমেশে উল্লেখ কৰা মতে ৰাহুল গান্ধীয়ে যাত্ৰাৰ মাজতে কালি আবেলি মৰথান্দমত এম.জি.এনৰেগাৰ একাংশ মহিলা কৰ্মীৰ সৈতে বাৰ্তালাপ কৰে। সেই সময়তে তেওঁলোকৰ মাজৰে এগৰাকীয়ে গান্ধীলৈ এই প্ৰস্তাৱ আগবঢ়ায়।

A hilarious moment from day 3 of #BharatJodoYatra

During @RahulGandhi’s interaction with women MGNREGA workers in Marthandam this afternoon, one lady said they know RG loved Tamil Nadu & they’re ready to get him married to a Tamil girl! RG looks most amused & the photo shows it! pic.twitter.com/0buo0gv7KH

— Jairam Ramesh (@Jairam_Ramesh) September 10, 2022

মহিলাগৰাকীয়ে কয় যে ৰাহুল গান্ধীয়ে তামিলনাডুক ভাল পায় বুলি তেওঁ জানে। গতিকে তেওঁলোকে ৰাহুল গান্ধীক এগৰাকী তামিল যুলৱতীৰ সৈতে বিয়া কৰাই দিব বিচাৰে। এই প্ৰস্তাৱ শুনি ৰাহুল গান্ধী প্ৰায় অভিভূত হৈ পৰে বুলি জয়ৰাম ৰমেশে লগতে উল্লেখ কৰে।

উল্লেখ্য যে কংগ্ৰেছে ‘ভাৰত জোড়ো যাত্ৰা’ৰ অধীনত দেশৰ ১২ খন ৰাজ্য ভ্ৰমণ কৰিব। জয়ৰাম ৰমেশ এই যাত্ৰাত ৰাহুল গান্ধীৰ অন্যতম সংগী। কংগ্ৰেছে এই যাত্ৰাৰ জৰিয়তে নিজৰ ৰাজনৈতিক উত্থানৰ প্ৰচেষ্টা চলোৱাৰ লগতে নিবনুৱা সমস্যা, মূল্যবৃদ্ধি ইত্যাদি বিষয়ত জনসাধাৰণৰ সৈতে পোনপটীয়াকৈ কাষ চপাৰ লক্ষ্য লৈছে।