মঙলবাৰে ৰাইজৰ দলে এখন সংবাদমেলত মাজুলীৰ বিজেপি প্ৰাৰ্থী ভুৱন গামৰ বিৰুদ্ধে দুৰ্নীতিৰ অভিযোগ দাঙি ধৰি তেওঁৰ বিৰুদ্ধে চিবিআইৰ তদন্ত দাবী কৰে।
ৰাইজৰ দলে অভিযোগ কৰে যে বিজেপিয়ে ভূ-মাফিয়া ভুৱন গামক প্ৰাৰ্থী হিচাপে প্ৰক্ষেপ কৰিছে। ভুৱন গামৰ বিৰুদ্ধে সোণাপুৰত এজাহাৰ দাখিল কৰা হৈছিল যদিও আজি পৰ্যন্ত তেওঁক গ্ৰেপ্তাৰ নহ’ল।
মুখ্যমন্ত্ৰী ড০ হিমন্ত বিশ্ব শৰ্মাৰ দুৰ্নীতিৰ বিৰুদ্ধে অভিযানক এক ভেকোভাওনা বুলি উল্লেখ কৰি ৰাইজে দলে প্ৰশ্ন কৰে যে এজাহাৰ দিয়া সত্তেও কিহৰ ভিত্তিত গামক ৰক্ষণাবেক্ষণ দিয়া হৈছে?
ৰাইজৰ দলৰ মুখ্যমন্ত্ৰীলৈ পোনপটীয়া প্ৰশ্ন, ‘’বাঘৰ দৰে বুলি কোৱা মুখ্যমন্ত্ৰী গৰাকী মেকুৰী হৈ গ’ল নেকি যে ভুৱন গামক দেখা নাই?’’
সোণাপুৰত ৫০ কোটি টকা ব্যয় সাপেক্ষে ২৫০ বিঘা ভূমিত জনজাতীয় সাংস্কৃতিক মিউজিয়াম গঢ়ি তোলা হৈছিল। এই সাংস্কৃতিক মিউজিয়াম নিৰ্মাণৰ কাম দিয়া হৈছিল গামৰ সংস্থাক।
ৰাইজৰ দলে কয় যে ২০১২ চনত হেমন্ত নাৰ্জাৰীৰ পত্নীক গামৰ কোম্পানীৰ সঞ্চালক পদত নিয়োগ কৰিছিল। গাম ডেলিকেচি কোম্পানীয়ে সেই মিউজিয়াম চোৱাচিতাৰ দায়িত্ব দিছিল বিজেপি নেতা স্বপ্ননীল বৰুৱাৰ কন্যা অংগিনা বৰুৱাক।
ৰহস্যজনকভাৱে ২০১৫ চনৰ ১৮ আগষ্টত সেই মিউজিয়ামটো জুইত ভষ্মীভুত হৈছিল। সংবাদ মাধ্যমতো এই বিষয়ে চৰ্চা চলিছিল।
প্ৰশাসনেও উচ্চ পদস্থ বিষয়াক তদন্তৰ দায়িত্ব দিছিল যদিও আজি পৰ্যন্ত তদন্তৰ কোনো প্ৰতিবেদন পোহৰলৈ নাহিল।
সংবাদমেলত ৰাইজৰ দলে এইবিষয়ত মুখ্যমন্ত্ৰীক চিবিআইৰ তদন্ত ঘোষণা কৰিবলৈ দাবী কৰি কয় যে তেতিয়াহে মুখ্যমন্ত্ৰী গৰাকী যে দুৰ্নীতিৰ বিৰুদ্ধে শূণ্য সহনশীল সেয়ে মানি লব পৰা যাব।
আনহাতে, ৰাইজৰ দলে অন্য এক অভিযোগ দাঙি ধৰি কয়, ‘’ভৰত নৰহ যেতিয়া কংগ্ৰেছ চৰকাৰৰ মন্ত্ৰী আছিল তেতিয়া সকলোতকৈ ডাঙৰ কেলেংকাৰী কৰিছিল ভুৱন গামে। তেওঁ ভৈয়াম জনজাতি কল্যাণৰ নামত দুৰ্নীতিৰ পাহাৰ গঢ়িছিল। ভুৱন গামে জনগোষ্ঠীয় মহিলাৰ নামত অহা টকা আত্মসাৎ কৰিছিল।‘’
