শচীন পাইলটক সংগ দিয়া বিধায়কে এতিয়া উভতি আহিব বিচাৰি কান্দি কান্দি মোক ফোন কৰিছে : অশোক গেহলট
ৰাজস্থানৰ মুখ্য মন্ত্ৰী অশোক গেহলটে সোমবাৰে এখন সংবাদমেল সম্বোধন কৰি যিসকল বিধায়কে ৰাজ্যখনৰ প্ৰাক্তন উপ-মুখ্য মন্ত্ৰী শচীন পাইলটক সমৰ্থন কৰিছিল তেওঁলোক বৰ্তমান আৱদ্ধ হৈ থাকিবলগীয়া হৈছে বুলি বিস্ফোৰক অভিযোগ কৰে।
”তেওঁলোকে আমাক যোগাযোগ কৰিব বিচাৰি আছে আৰু ফোনত কান্দি কান্দি তেওঁলোকৰ ভুল স্বীকাৰ কৰিছে,” মুখ্য মন্ত্ৰী অশোক গেহলটে লগতে কয়।
আনহাতে, বিসম্বাদী বিধায়ক সকলৰ বৰ্তমান ব্যক্তিগত মোবাইল ফোন সমূহো জব্দ কৰা হৈছে বুলি অভিযোগ কৰে মুখ্য মন্ত্ৰী গেহলটে।
তদুপৰি, বিসম্বাদ কৰা বহু কেইগৰাকী বিধায়কে এতিয়াও আমাৰ সৈতে যোগযোগ ৰক্ষা কৰি আছে আৰু পুনৰ দলৰ মজিয়ালৈ উভতি আহিবলৈ বিচাৰি আছে বুলি কয়।
গেহলটে সংবাদমেল সম্বোধন কৰি বিজেপি চৰকাৰে দীৰ্ঘদিন ধৰি ৰাজস্থান চৰকাৰ ভংগ কৰিব বিচাৰি আছে বুলিও কয়।
”মই ইয়াত পাচলি বিক্ৰী কৰি থাকিবলৈ অহা নাই, মই মুখ্য মন্ত্ৰী। যেতিয়া মই ছমাহ পূৰ্বৰে পৰা মোৰ বিৰুদ্ধে ষড়যন্ত্ৰ চলি আছে বুলি কৈছিলো তেতিয়া কোনো লোকে মোক বিশ্বাস কৰা নাছিল,” মুখ্য মন্ত্ৰী গেহলটে পুনৰ কয়।