কিছুদিন পূৰ্বে বিধানসভা নিৰ্বাচনত গেৰুৱা শিবিৰে বিপুল জয় সাৱ্যস্ত কৰিছিল। আত্মবিশ্বাস তুংগত আছিল। কিন্তু উপ-নিৰ্বাচনত মুখথেকেচা খালে বিজেপিৰ মন্ত্ৰী। ১১ হাজাৰ ভোটৰ ব্যৱধানত জয়লাভ কৰে কংগ্ৰেছ প্ৰাৰ্থীয়ে। ৰাজ্যখনৰ ৰাজনৈতিক বিশ্লেষকসকলৰ মতে এই জয়ে কংগ্ৰেছক পুনৰ ক্ষমতালৈ আনিব নোৱাৰে ঠিকেই, কিন্তু ই সন্মানৰ ভূমি পুনৰ দখলত সহায় কৰিব।
ৰাজস্থানত বিধানসভাৰ আসনৰ সংখ্যা ২০০ খন। যোৱা নিৰ্বাচনত ১৯৯টা সমষ্টিত ভোটগ্ৰহণ অনুষ্ঠিত হৈছিল। নিৰ্বাচনৰ দহ দিন পূৰ্বে কৰণপুৰ সমষ্টিৰ কংগ্ৰেছ প্ৰাৰ্থী গুৰমীত সিং কুনাৰৰ হঠাৎ মৃত্যু হয়। তাত ভোটদান স্থগিত ৰখা হৈছিল।
লগতে পঢ়কঃ জাৰ্মানীৰ বিশ্বজয়ী ফুটবলাৰ তথা প্ৰশিক্ষক কিংবদন্তি ফ্ৰাঞ্জ বেকেনবাউৰৰ দেহাৱসান
সেই আসনত উপ-নিৰ্বাচনত থিয় দিছিল মৃত কংগ্ৰেছ প্ৰাৰ্থীৰ পুত্ৰ ৰূপিন্দৰ সিং কুনাৰে। প্ৰতিদ্বন্দ্বী আছিল বিজেপিৰ নতুনকৈ মন্ত্ৰীসভাত অন্তৰ্ভুক্ত কেবিনেট মন্ত্ৰী সুৰেন্দ্ৰপাল সিং। সোমবাৰে ভোটগণনাত দেখা গ’ল যে ৰূপিন্দৰে ৯৪,৯৫০ টা ভোট লাভ কৰে। ফলত তেওঁ ১১,২৮৪ টা ভোটৰ ব্যৱধানত গেৰুৱা নেতা তথা মন্ত্ৰীক পৰাস্ত কৰি নিৰ্বাচিত হয়।
যুৱ নেতা ৰূপিন্দৰক অভিনন্দন জনাইছে প্ৰাক্তন মুখ্যমন্ত্ৰী তথা জ্যেষ্ঠ কংগ্ৰেছ নেতা অশোক গেহলটে। গেহলটে কয় যে কৰণপুৰৰ জনসাধাৰণে বিজেপিৰ অহংকাৰ চূৰ্ণ কৰি পেলাইছে। মানুহে উচিত শিক্ষা দিছে।
নিৰ্বাচনত এজন মন্ত্ৰী প্ৰক্ষেপ কৰি বিজেপিয়ে নিৰ্বাচনী আচৰণ বিধি আৰু নৈতিকতা উলংঘা কৰিছে বুলিও দাবী কৰিছে ৰাজস্থানৰ প্ৰাক্তন মুখ্যমন্ত্ৰীগৰাকীয়ে। কিন্তু মানুহে তাৰ যোগ্য প্ৰত্যুত্তৰ দিলে।
লগতে পঢ়কঃ ভাৰত জোড়ো ন্যায় যাত্ৰাৰ বাবে এতিয়াও পোৱা নাই অনুমতিঃ অভিযোগ কংগ্ৰেছৰ
উল্লেখ্য যে এই আসনখন জয় কৰাৰ পাছত বিধানসভাত কংগ্ৰেছৰ বিধায়কৰ সংখ্যা হ’লগৈ ৭০ জন। আনহাতে, শাসকীয় বিজেপিৰ ১১৫ জন বিধায়ক আছে।
