বুধবাৰে গুৱাহাটীলৈ আহিব ৰাজস্থান ৰয়েলছ দল; মাৰ্চৰ প্ৰথম সপ্তাহৰ পৰা প্ৰদান কৰিব টিকট

ইণ্ডিয়ান প্ৰিমিয়াৰ লীগ (আই পি এল)ৰ চিফ অপাৰেটিং অফিচাৰ হেমাংগ আমিন, আই এম জি ৰিলায়েন্সৰ প্ৰতিনিধি আৰু টি-২০ লীগৰ পেৰেণ্ট ব’ডিয়ে আজি বৰ্ষাপাৰা ক্ৰিকেট ষ্টেডিয়াম পৰিদৰ্শন কৰে।

উল্লেখ্য যে, ২০২০ বৰ্ষৰ আই পি এলৰ দুখন মেচৰ বাবে গুৱাহাটীৰ বৰ্ষাপাৰা ক্ৰিকেট ষ্টেডিয়ামক ৰাজস্থান ৰয়েলছ দলৰ নিজা স্থান (home venue) হিচাপে নিৰ্বাচিত কৰিছে।

ষ্টেডিয়াম পৰিদৰ্শনৰ পিছত আই পি এলৰ চিফ অপাৰেটিং অফিচাৰ হেমাংগ আমিন, আই এম জি ৰিলায়েন্সৰ প্ৰতিনিধি, টি-২০ লীগৰ পেৰেণ্ট ব’ডি আৰু অসম ক্ৰিকেট সন্থাৰ বিষয়ববীয়াৰ মাজত এখন গুৰুত্বপূৰ্ণ বৈঠক অনুষ্ঠিত হয়।

বৈঠকত ষ্টেডিয়ামৰ সা-সুবিধা, সুৰক্ষা আদিৰ লগতে বিভিন্ন দিশ সম্পৰ্কে আলোচনা কৰা হয় বুলি এটা সূত্ৰৰ পৰা জানিব পৰা গৈছে।

ইফালে প্ৰথম পৰ্যায়ৰ অনুশীলন শিবিৰৰ বাবে অহা ২৬ ফেব্ৰুৱাৰিত গুৱাহাটীলৈ আহিব ৰাজস্থান ৰয়েলছৰ দল। দলটোৱে বৰ্ষাপাৰা ক্ৰিকেট ষ্টেডিয়ামত ২৭ ফেব্ৰুৱাৰিৰ পৰা ২৯ ফেব্ৰুৱাৰিলৈ অনুশীলন চলাব।

আনহাতে যোৱা ১৬ ফেব্ৰুৱাৰিত প্ৰকাশ পোৱা IPL-2020-ৰ প্ৰাথমিক খেলবোৰৰ সূচী অনুসৰি ৫ এপ্ৰিল আৰু ৯ এপ্ৰিলৰ খেলৰ স্থান হিচাপে জয়পুৰৰ সৈতে গুৱাহাটীক এক বিকল্প হিচাপেহে ৰখা হৈছে।

উল্লেখ কৰিব পাৰি যে জয়পুৰৰ পৰা গুৱাহাটীলৈ ৰাজস্থান ৰয়েলছৰ খেল স্থানান্তৰ কৰাক লৈ ৰাজস্থান উচ্চ ন্যায়ালয়ত এখন ৰাজহুৱা স্বাৰ্থজড়িত আৱেদন দাখিল কৰিছিল।

আৱেদনখনত আৱেদনকাৰী ৰাহুল কানৱাট, বিমল চন্দ চৌধুৰী আৰু য়োগেছ কুমাৰে ন্যায়ালয়ৰ কাষ চাপি কৈছে যে জয়পুৰৰ বাহিৰলৈ খেল স্থানান্তৰ কৰাটো “ৰাজ্যখনৰ বাবে সন্মান হানিকৰ” হ’ব।

এই আইনী মেৰপেঁচৰ বাবেই গুৱাহাটীক নিশ্চিত স্থান হিচাপে সূচীত ঘোষণা কৰা নাই যদিও মেচ দুখন গুৱাহাটীতে অনুষ্ঠিত হ’ব বুলি অসম ক্ৰিকেট সন্থা আশাবাদী।

আইনীভাৱে যদি কোনো বাধা নাহে তেন্তে প্ৰথমবাৰৰ বাবে গুৱাহাটীত অনুষ্ঠিত হ’বলগীয়া আই পি এলৰ মেচ দুখনৰ বাবে মাৰ্চৰ প্ৰথম সপ্তাহৰ পৰা টিকট প্ৰদান কৰা হ’ব বুলিও অসম ক্ৰিকেট সন্থাই জানিবলৈ দিয়ে।

গুৱাহাটীক ৰাজস্থান ৰয়েলছ দলৰ নিজা স্থান (home venue) হিচাপে বিবেচিত কৰা হ’ব বুলি ওলোৱা খবৰৰ পিছতে উৎসাহী হৈ পৰিছিল অসমৰ ক্ৰিকেটপ্ৰেমী। কিয়নো ৰাজস্থান ৰয়েলছ দলত চুক্তিবদ্ধ হৈ আছে অসমৰ ৰিয়ান পৰাগ।