যোৱা ৩১ মাৰ্চৰ দিনা ৰাজ্যসভাৰ সাংসদ হিচাপে নিৰ্বাচিত হোৱা পবিত্ৰ মাৰ্ঘেৰিটাক আজি মুখ্যমন্ত্ৰীৰ ৰাজনৈতিক সচিব হিচাপে নিযুক্তি দিয়া হ’ল।
মন্ত্ৰী জয়ন্ত মল্ল বৰুৱা মুখ্যমন্ত্ৰীৰ ৰাজনৈতিক সচিব হিচাপে আছিল যদিও তেওঁক আঁতৰাই আজি ৰাজ্যসভাৰ সাংসদ পবিত্ৰ মাৰ্ঘেৰিটাক এই পদত অধিষ্ঠিত কৰা হ’ল।
ৰাজনৈতিক ইতিহাসত বোধ হয় প্ৰথমবাৰৰ কাৰণে ৰাজ্য সভা অৰ্থাৎ উচ্চ সদনৰ সন্মানীয় সদস্য এগৰাকীক অসমৰ মুখ্যমন্ত্ৰীৰ ৰাজনৈতিক সচিব হিচাপে নিযুক্তি দিয়া হৈছে।
মুখ্যমন্ত্ৰীৰ ৰাজনৈতিক সচিব সঁচাকৈয়ে এক গুৰুত্বপূৰ্ণ আৰু ব্যস্ততাপূৰ্ণ পদবী নে এক আলংকাৰিক পদ?
এতিয়া সন্মানীয় পবিত্ৰ মাৰ্ঘেৰিটা ডাঙৰীয়াই ৰাজ্যসভাৰ পৰা বেতন ল’ব নে মুখ্যমন্ত্ৰীৰ ৰাজনৈতিক সচিব হিচাপে মাহিলী বেতন আৰু অন্যান্য সা-সুবিধা লাভ কৰিব? এইবোৰক লৈ ৰাজনৈতিক মহলত আনকি বিজেপিৰে একাংশৰ মাজত বু-বা চলা শুনিবলৈ পোৱা গৈছে।
উচ্চ সদনৰ সদস্য এজন মুখ্যমন্ত্ৰীৰ ৰাজনৈতিক সচিব হ’লে তেওঁৰ পদমৰ্য্যদা হানি নহ’বনে বুলি একাংশই প্ৰশ্ন উত্থাপন কৰিছে।
অন্য এক প্ৰশ্ন উত্থাপন হৈছে জয়ন্ত মল্ল বৰুৱাৰ দৰে সাংসদ পবিত্ৰ মাৰ্ঘেৰিটাক কেবিনেট মৰ্য্যদা প্ৰদান কৰা হ’ব নে?
অৱশ্যে বিজেপিৰ একাংশ নেতা কৰ্মীয়ে হৰ্ষোল্লাস কৰি পবিত্ৰ মাৰ্ঘেৰিটাক অভিনন্দন তথা শুভেচ্ছা জ্ঞাপন কৰা দেখিবলৈ পোৱা গৈছে।
ইপিনে, ৰাজনৈতিক সচিব হিচাপে নিযুক্তি লাভ কৰি প্ৰতিক্ৰিয়া প্ৰকাশ কৰিছে পবিত্ৰ মাৰ্ঘেৰিটাই।
সংবাদ মাধ্যমৰ আগত তেওঁ কয় “ৰাজ্যিক বিজেপিৰ সভাপতি ভৱেশ কলিতাই মোক মুখ্যমন্ত্ৰীৰ ৰাজনৈতিক সচিব হিচাপে সেৱা আগবঢ়াবলৈ সুযোগ দিয়াৰ বাবে তেওঁক কৃতজ্ঞতা জ্ঞাপন কৰিছো। মুখ্যমন্ত্ৰী ড০ হিমন্ত বিশ্ব শৰ্মাৰ অনুজ সতীৰ্থ হিচাপে নিষ্ঠা আৰু সততাৰে কাম কৰি যাম। ড০ হিমন্ত বিশ্ব শৰ্মাৰ দৰে এগৰাকী কাৰ্য্যক্ষম ব্যক্তিৰ সৈতে সমানে খোজ দি যোৱাটো ইমান সহজ নহয়। তেওঁৰ মাৰ্গ দৰ্শনৰে তথা অসমবাসী ৰাইজৰ আশীৰ্বাদ লৈ কাম কৰি যাম।”
