সোমবাৰে সংসদৰ মকৰ দ্বাৰৰ পৰা নিৰ্বাচন আয়োগৰ কাৰ্যালয়ৰ ফালে বিৰোধী সাংসদসকলৰ প্ৰতিবাদী সমদলৰ সময়ত দিল্লী আৰক্ষীয়ে লোকসভাৰ কংগ্ৰেছ নেতা তথা বিৰোধী দলপতি ৰাহুল গান্ধী আৰু কেইবাজনো ইণ্ডিয়া ব্লকৰ নেতাক আটক কৰে।
বিহাৰত চলি থকা বিশেষ নিবিড় নিৰীক্ষণ আৰু ২০২৪ চনৰ লোকসভা নিৰ্বাচনত “ভোট চুৰি”ৰ অভিযোগ উত্থাপন কৰাৰ লক্ষ্যৰে এই সমদলউলিওৱা হৈছিল।
পৰিবহণ ভৱন পোৱাৰ পিছতে আৰক্ষীৰ বেৰিকেডেৰে এই সমদল বন্ধ কৰি ৰাহুল গান্ধী, প্ৰিয়ংকা গান্ধী ভাদ্ৰা, সঞ্জয় ৰাউত, সাগৰিকা ঘোষকে ধৰি কেইবাজনো নেতাক আটক কৰি ৰখা হয়। এই ঘটনাক লৈ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে।
ৰাহুল গান্ধীৰ নেতৃত্বত প্ৰায় ৩০০ সাংসদে অংশগ্ৰহণ কৰে এই সমদলত। ইয়াৰ ভিতৰত কংগ্ৰেছৰ সভাপতি মল্লিকাৰ্জুন খাৰ্গে, প্ৰিয়ংকা গান্ধী ভাদ্ৰা, সমাজবাদী পাৰ্টিৰ অখিলেশ যাদৱ, তৃণমূল কংগ্ৰেছৰ ডেৰেক অ’ব্ৰাইন আৰু মহুৱা মৈত্ৰ, ডি এম কেৰ টি আৰ বালু, শিৱসেনাৰ (ইউ বি টি)ৰ সঞ্জয় ৰাউত, আৰ জে ডি, চি পি আই, চি পি এম, এন চি পি (এছ পি) আৰু নেশ্যনেল কনফাৰেন্সৰ সাংসদসকল।
পদযাত্ৰা আৰম্ভ হোৱাৰ আগতেই মকৰ দ্বাৰত জাতীয় সংগীত গাই সাংসদসকলে প্ৰতিবাদ আৰম্ভ কৰে। এই পদযাত্ৰাৰ জৰিয়তে বিৰোধীয়ে ভোটাৰ তালিকাত স্বচ্ছতা আৰু নিৰ্বাচনী প্ৰক্ৰিয়াৰ নিৰপেক্ষতা নিশ্চিত কৰাৰ দাবী জনাই নিৰ্বাচন আয়োগক স্মাৰক পত্ৰ দাখিল কৰাৰ পৰিকল্পনা কৰিছিল।
ভোটাৰ তালিকাত জালিয়াতি কৰি ভোটাৰৰ অধিকাৰ কাঢ়ি নিয়াৰ প্ৰয়াস বুলি বিহাৰত SIR প্ৰক্ৰিয়াৰ বিৰুদ্ধে প্ৰতিবাদ সাব্যস্ত কৰিছে বিৰোধী দলসমূহে। কৰ্ণাটকৰ মহাদেৱপুৰা বিধানসভা সমষ্টিত প্ৰায় এক লাখ ভোট “চুৰি” হোৱা বুলি অভিযোগ উত্থাপন কৰিছে ৰাহুল গান্ধীয়ে।
তেওঁ দাবী কৰে যে এজন ব্যক্তিৰ নাম একাধিক ভোটকেন্দ্ৰত পঞ্জীয়ন কৰা হৈছে। তেওঁ ভোটাৰ তালিকাৰ ডিজিটেল তথ্য প্ৰকাশৰ দাবী জনায়। ৰাহুল গান্ধীয়ে কয়, “এই যুঁজখন ৰাজনৈতিক নহয়, সংবিধান ৰক্ষাৰ যুঁজ। এজন ব্যক্তি, এটা ভোটৰ যুঁজ। আমি বিচাৰো এখন নিকা, অবিকৃত ভোটাৰ তালিকা।”
দিল্লী আৰক্ষীয়ে জনোৱা মতে, শোভাযাত্ৰাৰ বাবে কোনো আনুষ্ঠানিক অনুমতি লোৱা হোৱা নাই। পৰিবহণ ভৱনৰ সমীপত আৰক্ষীয়ে বেৰিকেড স্থাপন কৰি শোভাযাত্ৰা বন্ধ কৰে। সমাজবাদী পাৰ্টিৰ নেত্ৰী অখিলেশ যাদৱ, মহুৱা মৈত্ৰ, আৰু সুষ্মিতা দেৱৰ লগতে একাংশ সাংসদে বেৰিকেড বগাই প্ৰতিবাদ অব্যাহত ৰাখিবলৈ চেষ্টা কৰে।
আৰক্ষীয়ে মেগাফোনত ঘোষণা কৰি সাংসদসকলক আগবাঢ়ি যোৱাত বাধা দিয়ে। এই সময়ত প্ৰিয়ংকা গান্ধী ভাদ্ৰাই চৰকাৰক কঠোৰ সমালোচনা কৰি কয়, “দৰে হুয়ে হায়। চৰকাৰ কয়াৰ হায়।” আৰক্ষীৰ হস্তক্ষেপে বিৰোধী দলসমূহৰ মাজত ক্ষোভৰ সৃষ্টি কৰিছে।
নিৰ্বাচন আয়োগে ৰাহুল গান্ধীৰ এই অভিযোগক “মিছা” বুলি খাৰিজ কৰি শপতনামাত প্ৰৱঞ্চনা কৰা বুলি অভিযোগ কৰা ভোটাৰৰ সবিশেষ দাখিল কৰিবলৈ নিৰ্দেশ দিছে। অৱশ্যে কংগ্ৰেছৰ সাংসদ জয়ৰাম ৰমেশৰ অনুৰোধত আয়োগে দিনৰ ১২ বজাত ৩০ জন সাংসদৰ সৈতে সাক্ষাৎকাৰৰ সময় ধাৰ্য কৰিছে।
এই ঘটনাৰ বাবে সংসদৰ দুয়ো সদন দুপৰীয়া ২ বজালৈ স্থগিত ৰখা হয়। বিৰোধী দলৰ সাংসদসকলে সংসদত এই বিষয়ত আলোচনাৰ দাবীত শ্লোগান উত্থাপন কৰাৰ লগতে প্লেকাৰ্ড প্ৰদৰ্শন কৰে। শোভাযাত্ৰাত অংশগ্ৰহণ কৰা সাংসদসকলে ৰঙা টুপী পিন্ধিছিল, য’ত ৰঙা ক্ৰছৰে “SIR” আৰু “Vote theft” লিখা আছিল। তেওঁলোকে বিভিন্ন ভাষাৰ পোষ্টাৰ লৈ গৈছিল য’ত লিখা আছিল “এছআইআৰ + ভোট চুৰি = গণতন্ত্ৰৰ হত্যা” আৰু “এছআইৰ – গণতন্ত্ৰৰ ওপৰত আঘাত”।
এই ঘটনাই গণতন্ত্ৰৰ স্বচ্ছতাক লৈ গুৰুতৰ প্ৰশ্নৰ উত্থাপন কৰিছে। বিৰোধী দলসমূহে দাবী কৰিছে যে চৰকাৰ আৰু নিৰ্বাচন আয়োগে যৌথভাৱে ভোটাৰ তালিকাত জালিয়াতি কৰিছে। ছ’চিয়েল মিডিয়াত ক্ষোভ প্ৰকাশ কৰিছে বিৰোধী নেতাসকলে। কংগ্ৰেছ দলৰ অফিচিয়েল হেণ্ডেলত লিখা হৈছে, “নৰেন্দ্ৰ মোদীয়ে সাংসদক আৰক্ষীৰ জিম্মাত লৈছে, নৰেন্দ্ৰ মোদীয়ে কি ভয় কৰিছে?”
ৰাহুল গান্ধীকে ধৰি ইণ্ডিয়া ব্লকৰ নেতাসকলক আটক কৰি ৰখাৰ ফলত ভাৰতৰ নিৰ্বাচনী প্ৰক্ৰিয়াৰ স্বচ্ছতাক লৈ বিতৰ্ক তীব্ৰতৰ হৈ পৰিছে। এই প্ৰতিবাদে গণতন্ত্ৰৰ মূল শিলাস্তম্ভ “এজন ব্যক্তি, এক ভোট” নীতিৰ প্ৰতি বিৰোধীৰ দায়বদ্ধতা প্ৰদৰ্শন কৰিছে। কিন্তু আৰক্ষীৰ হস্তক্ষেপ আৰু চৰকাৰৰ মৌনতাই বিতৰ্কক আৰু অধিক তীব্ৰতৰ কৰি তুলিব পাৰে।
