জনপ্ৰিয় ইউটিউবাৰ তথা কন্টেন্ট ক্ৰিয়েটৰ ৰণবীৰ এলাহাবাদিয়া। শেহতীয়াকৈ তেওঁ ইউটিউব শ্ব’ত পিতৃ-মাতৃৰ যৌনতাক লৈ অশ্লীল মন্তব্য কৰাৰ অভিযোগত বিতৰ্কৰ আওতাত সোমাই পৰিছে।
বিষয়টোক লৈ বিতৰ্ক ইমানেই বৃদ্ধি পাইছে যে তেওঁ এটা সুকীয়া ভিডিঅ’ৰ জৰিয়তে সকলোৰে ওচৰত ক্ষমা বিচাৰিছে।
মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাডনৱিছেও সাংবাদিকৰ প্ৰশ্নৰ উত্তৰত কয় যে সকলোৰে মত প্ৰকাশৰ স্বাধীনতা আছে। কিন্তু সেয়া নিৰ্দিষ্ট সীমাৰ ভিতৰত হ’ব লাগে। যদি তেওঁ নীতি-নিয়ম উলংঘা কৰে তেন্তে তেওঁৰ বিৰুদ্ধে উপযুক্ত ব্যৱস্থা গ্ৰহণ কৰা হ’ব।
উল্লেখ্য যে এই বিতৰ্কৰ পিছত নিজৰ চেনেলটোৰ ২০ লাখ চাবস্ক্ৰাইবাৰ হেৰুৱাইছে ৰণবীৰে।
সূত্ৰ অনুসৰি ৰণবীৰৰ সম্পত্তিৰ মুঠ মূল্য ৬০ কোটি টকাৰ ওচৰ চাপিছে। তেওঁৰ মাহিলী আয় প্ৰায় ৩৫ লাখ টকা। ইয়াৰে এটা বৃহৎ অংশ ইউটিউবৰ পৰা আহে। বিভিন্ন ব্ৰেণ্ডৰ লগত হোৱা চুক্তি, প’ডকাষ্ট আৰু অন্যান্য ব্যৱসায়িক চুক্তিৰ পৰাও আহে কোটি কোটি টকা।
২০১৪ চনত নিজাকৈ এটা চেনেল খুলিছিল ৰণবীৰে। নামটো হৈছে ‘বীয়েৰ বাইচেপছ’। আৰম্ভণিতে তেওঁ তাত কেৱল ফিটনেছ সম্পৰ্কীয় তথ্যহে শ্বেয়াৰ কৰিছিল। তাৰ পাছত লাহে লাহে সেই চেনেলটোৰ বিভিন্ন শাখা-প্ৰশাখাৰ জন্ম হ’ল। ফিটনেছৰ লগতে ব্যৱসায়, আধ্যাত্মিকতা, আত্মউন্নতিৰ ওপৰত গুৰুত্ব দিবলৈ ধৰিলে ৰণবীৰে। তাৰপিছত পডকাষ্টো আৰম্ভ কৰিলে তেওঁ। তেওঁ পডকাষ্টলৈ আহিল বিভিন্ন ক্ষেত্ৰৰ বিখ্যাত ব্যক্তিসকল। এ আৰ ৰহমানৰ পৰা অক্ষয় কুমাৰ, নীতিন গাডকাৰীৰ পৰা জন আব্ৰাহামলৈকে বিভিন্ন জনপ্ৰিয় ব্যক্তি তেওঁৰ অনুষ্ঠানৰ অতিথি হ’ল।
ইতিমধ্যে ‘বীয়েৰ বাইচেপছ‘ৰ অধীনত সৰু-বৰ মুঠ ৭টা ইউটিউব চেনেল আছে। এই সকলোবোৰ মিলি মুঠ চাসক্ৰাইৱাৰৰ সংখ্যা ১.২ কোটি। ইয়াৰ পৰা প্ৰতিমাহে হিচাপে ৮ৰ পৰা ১০ কোটি টকা লাভ কৰে ৰণবীৰে।
উল্লেখ্য কৰাৰ প্ৰয়োজন নাই যে অনুৰাগীৰ মাজত বিপুল জনপ্ৰিয়তা লাভ কৰিছে ৰণবীৰ। সেয়েহে বিভিন্ন জীৱনশৈলী, বিত্ত, ব্যৱসায়, আৰু ফিটনেছ সম্পৰ্কীয় সংস্থাই ইতিমধ্যে তেওঁক তেওঁলোকৰ প্ৰমোচনৰ দায়িত্ব দিছে। ইয়াৰ ভিতৰত আছে বহু ব্যয়বহুল কোম্পানী।
ইতিমধ্যে তেওঁ নিজা উদ্যোগত ‘মনকি এন্টাৰটেনমেন্ট’ নামৰ এটা স্বতন্ত্ৰ কোম্পানী খুলিছে। কিন্তু শেহতীয়াকৈ হোৱা বিতৰ্কই জোকাৰি গৈছে ৰণবীৰৰ জীৱন। ক্ষমা খুজিও তৎ পোৱা নাই ইউটিউবাৰগৰাকীয়ে। লাখ লাখ চাসক্ৰাইবাৰে ইতিমধ্যে আনচাসক্ৰাইব কৰিছে ৰণবীৰৰ চেনেল। যাৰ বাবে লাহে লাহে ৰণবীৰৰ জনপ্ৰিয়তাৰ লগতে সম্পত্তিও হ্ৰাস পাব বুলি ঠাৱৰ কৰিছে দৰ্শকসকলে।
