ৰাজ্যিক বিজেপিৰ নিৰ্বাচন : ৰঞ্জিত দাসলৈ সভাপতি হিচাপে অন্য এটা কাৰ্য্যকালৰ সুযোগ?
অসম বিজেপিৰ পৰৱৰ্তী সভাপতি নিৰ্বাচনৰ দিশত দলটো আগ বঢ়াৰ সময়ত চৰ্চালৈ আহিছে বিভিন্নজন পদ প্ৰত্যাশীৰ নাম।
জলসিঞ্চন বিভাগৰ মন্ত্ৰী ভৱেশ কলিতা, প্ৰাক্তন সাংসদ ৰমেন ডেকা, বৰ্তমানৰ ৰাজ্যিক উপ-সভাপতি প্ৰদীপ ঠাকুৰীয়াকে ধৰি অন্য বহুকেইগৰাকী পদটোৰ দৌৰত আছে।
কিন্তু দলৰ বিশ্বস্ত খবৰমতে, কেইবাজনো ৰাজ্যিক শীৰ্ষ নেতাৰ নাম চৰ্চাত আছে যদিও বৰ্তমানৰ সভাপতি ৰঞ্জিত দাসে অন্য এটা কাৰ্য্যকালৰ বাবে সুযোগ পোৱাৰ সম্ভাৱনা আন সকলো সম্ভাৱনাতকৈ বেছি।
দাসৰ ঘনিষ্ঠ সূত্ৰটোৰ দাবী, “এইবাৰ অন্য কাকো অগ্ৰাধিকাৰ দিয়া নাই। সভাপতি ৰঞ্জিত দাস এইবাৰলৈয়ো বাহাল থাকিব। বিজেপিৰ ৰাষ্ট্ৰীয় সমিতিয়ে দাসকে সভাপতি হিচাপে বাহাল ৰাখিব।”
সূত্ৰটোৱে যুক্তি হিচাপে দাসে সভাপতিৰ দায়িত্ব লোৱাৰ পিছৰ পৰা বুথ পৰ্য্যায়ত সংগঠনৰ ভেটি মজবুত হোৱা বুলি দাবী কৰে।
“দাসে নিজৰ কাৰ্য্যকালত ৰাজ্যৰ সকলো জিলাতে বুথ পৰ্য্যায়ত কমিটী নিৰ্মাণ কৰিলে। দাসৰ আটাইতকৈ ডাঙৰ কামটো হৈছে বুথ পৰ্য্যায়ত পৃষ্ঠাপ্ৰমুখ নিযুক্তি, যি বিগত কেইবাটাও নিৰ্বাচনত তৃণমূল পৰ্য্যায়ৰ পৰা বিজেপিক শক্তিশালী কৰিছিল”, সূত্ৰটোৱে কয়।
তদুপৰি, দাসৰ কাৰ্য্যকালত দলে উপ-নিৰ্বাচন, স্বায়ত্ত পৰিষদৰ নিৰ্বাচন, লোকসভা নিৰ্বাচন, পঞ্চায়ত নিৰ্বাচনকে ধৰি ধাৰাবাহিক সফলতা লাভ কৰি আহিছে।
দলৰ তৃণমূল পৰ্য্যায়ৰ কৰ্মীৰ পৰা উচ্চস্তৰীয় নেতালৈকে সকলোৱে দাসকে সভাপতি হিচাপে বাহাল ৰখাটো বিচাৰিছে বুলিও দাবী সূত্ৰটোৰ।
দলটোৰ ৰাজ্যিক নিৰ্বাচন প্ৰভাৰীৰ দায়িত্বত থকা ভৱেশ কলিতাই আজি এক প্ৰেছ বিজ্ঞপ্তি যোগে অহা ১১ ছেপ্টেম্বৰৰ পৰা বুথ পৰ্য্যায়ৰ পৰা ৰাজ্যিক পৰ্য্যায়লৈকে সভাপতি নিৰ্বাচনৰ প্ৰক্ৰিয়া আৰম্ভ হ’ব বুলি জনায়।
১১ ছেপ্টেম্বৰৰ পৰা ৩০ চেপ্তেম্বৰলৈ বুথ পৰ্য্যায়ৰ সভাপতি আৰু সদস্য নিৰ্বাচন, ১১ ছেপ্টেম্বৰৰ পৰা ৩১ অক্টোবৰলৈ মণ্ডল সভাপতি তথা মণ্ডল সমিতি গঠন, ১১ অক্টোবৰৰ পৰা ৩০ অক্টোবৰলৈ জিলা সভাপতি আৰু ৰাজ্যিক পৰিষদৰ সদস্য নিৰ্বাচন আৰু ১ ডিচেম্বৰৰ পৰা ১৫ ডিচেম্বৰলৈকে ৰাজ্যিক সভাপতি আৰু ৰাষ্ট্ৰীয় পৰিষদৰ সদস্য নিৰ্বাচন অনুষ্ঠিত হ’ব।
ৰঞ্জিত দাস ২০১৭ চনৰ ৩০ জানুৱাৰিত ৰাজ্যিক বিজেপিৰ সভাপতিৰ পদত অধিষ্ঠিত হৈছিল।