ব্যৱসায়ীৰ পৰা ধন লুট কৰা মাৰ্ঘেৰিটা বিজেপি যুৱ মৰ্চাৰ তিনিজনকৈ নেতাক আজি দলীয় বিষয়বাবৰ পৰা আজি বহিষ্কাৰ কৰা হয়।
বহিষ্কৃত নেতাকেইজন হ’ল যুৱ মৰ্চাৰ মাৰ্ঘেৰিটা সদৰ মণ্ডলৰ সভাপতি বিতুপন শৰ্মা বৰুৱা, যুৱ মৰ্চাৰ আন এজন বিষয়ববীয়া সঞ্জিত গগৈ ওৰফে চুনু আৰু মিণ্টু কোঁচ৷
আজি সন্ধিয়া বিজেপিৰ সদৰ মণ্ডলে দলীয় কাৰ্যালয়ত অনুষ্ঠিত কৰা এখন সংবাদমেলত এই কথা জানিবলৈ দিয়ে সভাপতি ভাদেশ্বৰ মৰাণে৷
খবৰ মতে, বিজেপি যুৱ মৰ্চাৰ মাৰ্ঘেৰিটা সদৰ মণ্ডলৰ সভাপতি বিতোপন শৰ্মা বৰুৱা, যুৱ মৰ্চাৰ আন এজন বিষয়ববীয়া সঞ্জিত গগৈ ওৰফে চুনু আৰু বিধায়ক ভাস্কৰ শৰ্মাৰ গাৰ ছাঁৰ দৰে লাগি ফুৰা মিণ্টু কোঁচে শনিবাৰে নিশা মাৰ্ঘেৰিটাৰ এখন লাইন হোটেলত লক্ষাধিক টকা দাবী কৰিছিল। তাৰ পিছত আটাইকেইজনে ৫০ হেজাৰ টকা লুট কৰি নিয়াৰ উপৰি প্ৰতিমাহে ৩০ হাজাৰকৈ টকা কমিচন হিচাপে দিবলৈ হুমকি দিছিল। ১৭ আগষ্টৰ ৰাতি সংঘটিত এই গুণ্ডাগিৰিৰ খবৰ সংবাদ মাধ্যমতো প্ৰচাৰ হৈছিল।
উক্ত ৰাতি বিধায়ক ভাস্কৰ শৰ্মাক বিমান বন্দৰত আগ বঢ়াই থ’বলৈ যোৱা তিনিওজন বিজেপিৰ কৰ্মকৰ্তাই বিধায়কজনৰ দুজন দেহৰক্ষীক লৈ বিধায়কৰ গাড়ীৰে মাৰ্ঘেৰিটালৈ উভতি অহাৰ সময়তে ডিগবৈৰ পাৱৈস্থিত ভগৱান ধাবাত প্ৰৱেশ কৰে৷
ধাবাৰ পাছফালে পে’ট্ৰল-ডিজেলৰ চোৰাং ব্যৱসায় দেখা পাই তিনিওজনে বিধায়ক ভাস্কৰ শৰ্মাৰ অতি ঘনিষ্ঠ বুলি জাহিৰ কৰি ১ লাখ টকা দাবী কৰে।
তাতে ক্ষান্ত নাথাকি গুণ্ডাগিৰিৰে ধাবাৰ কৰ্মচাৰী এজনক মাৰ-ধৰো কৰে৷ দাবী-ধমকিৰে তিনি বিজেপি নেতাই ধাবাখনৰ পৰা নগদ ৫০ হেজাৰ টকা কাঢ়ি লৈ যায়৷
ইয়াৰ পিছতে ঘটনাটো বিভিন্ন সংবাদ মাধ্যমত প্ৰকাশ পায়। ঘটনা সন্দৰ্ভত জানিব পাৰি খঙত অগ্নিশৰ্মা হৈ পৰা বিধায়ক ভাস্কৰ শৰ্মাই এই তিনি বিজেপি কৰ্মকৰ্তাক সকলো কাম-কাজৰ পৰা অব্যাহতি দিয়ে৷
আনহাতে বিধায়কজনৰ নিদেৰ্শত নিশাই উক্ত ধন অভিযুক্তৰ ঘনিষ্ঠই ধাবাখনত ঘূৰাই দি আহে৷ জানিব পৰামতে, উক্ত ঘটনাত জড়িত বিধায়ক ভাস্কৰ শৰ্মাৰ দেহৰক্ষী প্ৰদীপ বৰদলৈকো নিলম্বিত কৰাৰ লগতে ঘটনাত জড়িত আন এজন অসম আৰক্ষীৰ বেটেলিয়ান জোৱানৰ ওপৰতো শাস্তিমূলক ব্যৱস্থা গ্ৰহণ কৰা হৈছে৷
