যোৱা ২৭ জানুৱাৰীত দিল্লীত কেন্দ্ৰীয় গৃহ মন্ত্ৰ্যালয়, ৰাজ্য চৰকাৰৰ মুখ্য মন্ত্ৰী সৰ্বানন্দ সোণোৱাল, নিজকে দুই নম্বৰৰ মন্ত্ৰী বুলি চিনাকি দিয়া “শক্তিশালী” মন্ত্ৰী হিমন্ত বিশ্ব শৰ্মা, নিখিল বড়ো ছাত্ৰ সন্থা আৰু এন ডি এফ বিৰ চাৰিটা গোটৰ নেতৃত্বৰ মাজত স্বাক্ষৰিত হৈছিল বড়ো শান্তি চুক্তি।
দিল্লীত চুক্তি স্বাক্ষৰিত হোৱাৰ পাছত সংবাদমেল সম্বোধন কৰি চুক্তি সম্পৰ্কে অসমবাসীক অৱগত কৰাৰে পৰা অসমতো আহি গুৱাহাটীত সংবাদমেল সম্বোধনৰে বড়ো শান্তি চুক্তিৰ বিভিন্ন দিশবোৰ সন্দৰ্ভত বিৱৰণ আগবঢ়াইছিল মন্ত্ৰী হিমন্তই।
কিন্তু তাৰ পাছতো এই বৃহৎ সফলতাৰ কৃতিত্বৰ পৰা মন্ত্ৰী হিমন্ত বিশ্ব শৰ্মাক একাষৰীয়া কৰিলে বিজেপিৰ ৰাজ্যিক সভাপতি ৰঞ্জিত দাসে।
৭ ফেব্ৰুৱাৰিৰ মোদীৰ অসম ভ্ৰমণৰ আগে আগে এটা ধন্যবাদসূচক টুইট কৰিছিল ৰাজ্যিক বিজেপিৰ সভাপতিগৰাকীয়ে। টুইটটোত বড়ো চুক্তিৰ সম্পূৰ্ণ কৃতিত্ব দিয়ে প্ৰধান মন্ত্ৰী নৰেন্দ্ৰ মোদীৰ লগতে মুখ্য মন্ত্ৰী সৰ্বানন্দ সোণোৱালক।
The credit for the recent signing of the historic #BodoPeaceAccord fully goes to HPM @NarendraModi and HCM @sarbanandsonwal. It has brought an end to the 5 decades long Bodo dispute and is the beginning of a new peaceful journey.#AssamWelcomesModi#BodoPeaceAccord
— Ranjeet Kumar Dass (@RanjeetkrDass) February 7, 2020
টুইটটোত ৰাজ্যিক বিজেপিৰ সভাপতি দাসে লিখে, “অলপতে স্বাক্ষৰিত হোৱা ঐতিহাসিক বড়ো শান্তি চুক্তিৰ সম্পূৰ্ণ কৃতিত্ব প্ৰধান মন্ত্ৰী নৰেন্দ্ৰ মোদী আৰু মুখ্য মন্ত্ৰী সৰ্বানন্দ সোণোৱালৰ। ই ৫ দশকৰ বড়ো বিবাদৰ অন্ত পেলালে আৰু এক শান্তিপূৰ্ণ যাত্ৰা আৰম্ভ হ’ল।”
পোষ্টটোত দাসে মন্ত্ৰী হিমন্ত বিশ্ব শৰ্মাৰ নাম লোৱাটো বাদেই তেওঁক টেগ কৰাও দেখিবলৈ পোৱা নগ’ল।
উল্লেখযোগ্য যে, বড়ো শান্তি চুক্তিৰ পাছত যোৱা ৩০ জানুৱাৰিত এন ডি এফ বিৰ চাৰিওটা গোটৰ ১৬১৫গৰাকী কেডাৰৰ অস্ত্ৰ সম্বৰণ অনুষ্ঠানত উপস্থিত থাকি অস্ত্ৰ সম্বৰণকাৰীসকলৰ সংস্থাপন কৰাৰ কথা ঘোষণা কৰাৰ লগতে আগন্তুক বাজেট অধিৱেশনত তেওঁলোকৰ বাবে বিশেষ আঁচনি গ্ৰহণ কৰাৰো আশ্বাস দিছিল মন্ত্ৰী হিমন্ত বিশ্ব শৰ্মাই।