ভাৰতৰ সৰ্বকালৰ অন্যতম শ্ৰেষ্ঠ স্পিনাৰ ৰবিচন্দ্ৰন অশ্বিনে আজি পুৱা এটা ডাঙৰ ঘোষণা কৰে। তেওঁ ইণ্ডিয়ান প্ৰিমিয়াৰ লীগ (আই পি এল)ৰ পৰা অৱসৰ লোৱাৰ কথা ঘোষণা কৰে। এক্স হেণ্ডেলত এই সিদ্ধান্ত তেওঁ নিজেই ঘোষণা কৰিছে। অৰ্থাৎ অশ্বিনক আৰু আই পি এলত দেখা নাযাব।
অশ্বিনে এক্স হেণ্ডেলত লিখিছে, ‘কোৱা হয় যে প্ৰতিটো সমাপ্তিৰ লগে লগে এটা নতুন আৰম্ভণি আহে। আই পি এল ক্ৰিকেটাৰ হিচাপে মোৰ সময় আজি শেষ হ’ল। কিন্তু আজিৰ পৰা আৰম্ভ হৈছে খেলখনক পুনৰ আৱিষ্কাৰ কৰাৰ যাত্ৰা, বিভিন্ন লীগত নতুন অভিজ্ঞতা আহৰণৰ অধ্যায়। এই দীৰ্ঘ সময়ছোৱাত মই লাভ কৰা আচৰিত স্মৃতি আৰু সম্পৰ্কৰ বাবে সকলো ফ্ৰেঞ্চাইজিকে ধন্যবাদ জনাইছো। আৰু আটাইতকৈ ডাঙৰ কথা, মোক ইমানখিনি দিয়াৰ বাবে আই পি এল আৰু বি চি চি আইক ধন্যবাদ জনাইছো। এতিয়া আগলৈ যি আহি আছে তাক উপভোগ কৰিবলৈ আৰু মোৰ শ্ৰেষ্ঠখিনি দিবলৈ মই আগ্ৰহী।’
আজি গণেশ চতুৰ্থীৰ দিনটোত অশ্বিনে এই বিশেষ ঘোষণা কৰে। এইবাৰ চেন্নাই ছুপাৰ কিংছে (চি এছ কে) অশ্বিনক ৯.৭৫ কোটি টকাত ক্ৰয় কৰিছিল। চি এছ কেলৈ উভতি অহাটো আছিল এক প্ৰকাৰৰ ঘৰলৈ উভতি অহাৰ দৰে। অৱশ্যে আশা কৰা ধৰণে নহ’ল। তেওঁ মাত্ৰ ৯খন মেচ খেলিছিল, মাত্ৰ ৭টা উইকেটহে লাভ কৰিছিল। চলিত মাহৰ আৰম্ভণিতে শুনা গৈছিল যে চি এছ কে আৰু অশ্বিনৰ সম্পৰ্ক বিচ্ছিন্ন হ’ব পাৰে। কিন্তু তাৰ আগতে তেওঁ অৱসৰৰ কথা ঘোষণা কৰিলে।
২০০৯ চনত চি এছ কেৰ হৈ আই পি এলত অভিষেক ঘটোৱা ৩৮ বছৰীয়া অফ স্পিনাৰগৰাকীয়ে দীৰ্ঘদিনীয়া কেৰিয়াৰত একাধিক ফ্ৰেঞ্চাইজিৰ হৈ ২২১খন মেচ খেলি ১৮৭টা উইকেট দখল কৰিছে। ২০১০ আৰু ২০১১ চনত চি এছ কেৰ আই পি এল জয়ৰ মূল সদস্য আছিল। সেই দুটা ছিজনত তেওঁ ক্ৰমে ১৩ আৰু ২০ উইকেট দখল কৰিছিল। ইয়াৰ উপৰিও তেওঁ পঞ্জাব কিংছ (য’ত তেওঁ অধিনায়ক আছিল), দিল্লী কেপিটেলছ আৰু ৰাজস্থান ৰয়েলছৰ হৈও খেলিছে।
