আঘাতৰ পৰা সুস্থ হৈয়ে এৰি যোৱা পথেৰে পুনৰ পথ বুলিছে ভাৰতীয় দলৰ তাৰকা অলৰাউণ্ডাৰ ৰবীন্দ্ৰ জাদেজাই। টেষ্ট ৰেংকিঙৰ শীৰ্ষস্থানীয় অলৰাউণ্ডাৰ গৰাকীয়ে প্ৰত্যাবৰ্তন মেচতে দুৰন্ত অলৰাউণ্ড প্ৰদৰ্শনেৰে ভাৰতৰ জয়ত মূখ্য ভূমিকা লৈছিল। জাদেজাৰ এই প্ৰদৰ্শনৰ ধাৰা আজিৰ পৰা দিল্লীত আৰম্ভ হোৱা দ্বিতীয়খন টেষ্টতো অব্যাহত আছে।
দিল্লীৰ অৰুণ জেটলী ষ্টেডিয়ামত অনুষ্ঠিত হোৱা দ্বিতীয়খন টেষ্টৰ আজি প্ৰথম দিনাই ভাৰতীয় বলিং আক্ৰমণত দিশহাৰা হৈ ২৬৩ ৰানতে ইনিংছ সামৰিছে। ভাৰতৰ হৈ পেচাৰ মহম্মদ ছামিয়ে চাৰিটা আৰু স্পিনাৰদ্বয় অশ্বিন আৰু জাদেজাই তিনিটাকৈ উইকেট লাভ কৰে।
এই তিনিটা উইকেটেৰে জাদেজাই টেষ্ট কেৰিয়াৰত ২৫০ উইকেটৰ সীমা অতিক্ৰম কৰে। সামগ্ৰিকভাৱে জাদেজাই ৬২ খন টেষ্টত বৰ্তমানলৈ ২৫২ টা উইকেট দখল কৰিছে। আনহাতে বিগত সময়চোৱাত বেটিঙতো দুৰন্ত প্ৰদৰ্শন কৰি অহা জাদেজাই ২৫০০ ৰানৰ সীমাও ইতিপূৰ্বেই পাৰ কৰিছে।
এইদৰে টেষ্টত ২৫০০ ৰান সংগ্ৰহ আৰু ২৫০ উইকেট দখল কৰা দ্ৰুততম ভাৰতীয় ক্ৰিকেটাৰৰ ঈৰ্ষণীয় অভিলেখ নিজ কেৰিয়াৰত সংযোজন কৰে ৰবীন্দ্ৰ জাদেজাই। এই ক্ষেত্ৰত জাদেজাই অতিক্ৰম কৰে কিংবদন্তী ভাৰতীয় ক্ৰিকেটাৰ কপিল দেৱক। কপিল দেৱে ৬৫ খন টেষ্টত এই সাফল্য লাভ কৰিছিল।
এতিয়া জাদেজাই কপিল দেৱতকৈ তিনিখন কম টেষ্টত এই মাইলষ্ট’ন স্পৰ্শ কৰি ভাৰতীয় অভিলেখ স্থাপন কৰে। সামগ্ৰিকভাৱে জাদেজা বিশ্ব ক্ৰিকেটত এই তালিকাত দ্বিতীয় স্থানত আছে। ইংলেণ্ডৰ কিংবদন্তী অলৰাউণ্ডাৰ ইয়ান ব’থামে মাত্ৰ ৫৫খন মেচতে এই আকৰ্ষণীয় কৃতিত্ব অৰ্জন কৰিছিল।
উল্লেখ্য যে, অষ্ট্ৰেলিয়াই আজি টছত জয়ী হৈ প্ৰথমে বেটিং কৰাৰ সিদ্ধান্ত লয় আৰু দিনটোৰ খেল সামৰণিৰ পূৰ্বেই সকলো উইকেট হেৰুৱাই ২৬৩ ৰানতে ইনিংছ সামৰে। দলৰ হৈ খাৱাজাই সৰ্বাধিক ৮১ ৰান সংগ্ৰহ কৰাৰ বিপৰীতে হেণ্ডচকম্বে ৭২ ৰান কৰি অপৰাজিত থাকে। অধিনায়ক কামিনছে ৩৩ ৰানৰ গুৰুত্বপূৰ্ণ অৱদান আগবঢ়ায়।
আনহাতে ভাৰতে ইনিংছ আৰম্ভ কৰি প্ৰথম দিনৰ খেল সামৰণিলৈ ২১ ৰান সংগ্ৰহ কৰিছে। অধিনায়ক ৰোহিত শৰ্মাই ১৩ আৰু কে এল ৰাহুলে ৪ ৰান সংগ্ৰহেৰে অপৰাজিত আছে। হাতত সম্পূৰ্ণ দহটা উইকেট বাকী থকা অৱস্থাত ভাৰত অষ্ট্ৰেলিয়াৰ প্ৰথম ইনিংছতকৈ ২৪২ ৰানত পিছ পৰি আছে।
