মধ্যবিত্ত শ্ৰেণীলৈ সকাহ দি RBI এ হ্ৰাস কৰিলে ৰেপো ৰেট! হ্ৰাস পাব ঘৰ আৰু গাড়ীৰ ঋণৰ EMI
ভাৰতীয় ৰিজাৰ্ভ বেংকে (RBI) বাণিজ্যিক বেংকক হ্ৰস্বম্যাদী প্ৰয়োজনৰ বাবে ধন ধাৰে দিয়া সুতৰ হাৰ বা ৰেপো ৰেট হ্ৰাস কৰাৰ সিদ্ধান্ত গ্ৰহণ কৰিছে। যি মুদ্ৰাস্ফীতি নিয়ন্ত্ৰণৰ বাবে এক গুৰুত্বপূৰ্ণ আহিলা হিচাপে কাম কৰে।
ভাৰতীয় ৰিজাৰ্ভ বেংকে ৰেপো ৰেট হ্ৰাস কৰি কিছু সকাহ প্ৰদান কৰিছে মধ্যবিত্ত শ্ৰেণীক । বুধবাৰে আৰ বি আইৰ গৱৰ্ণৰ সঞ্জয় মালহোত্ৰাই ঘোষণা কৰিলে নতুন ৰেপো ৰেট। বৰ্তমানৰ ৰেপো ৰেট ৬.২৫ শতাংশৰ পৰা ৬ শতাংশলৈ হ্ৰাস পাইছে।
প্ৰসংগক্ৰমে বিগত দুবছৰ ধৰি আৰ বি আইয়ে ৰেপো ৰেট অপৰিৱৰ্তিত ৰাখিছিল। শক্তিকান্ত দাসে গৱৰ্ণৰ পদৰ পৰা অৱসৰ লোৱাৰ পিছতে দায়িত্বভাৰ গ্ৰহণ কৰাৰ পিছত ফেব্ৰুৱাৰী মাহত আৰ বি আইৰ গৱৰ্ণৰ সঞ্জয় মালহোত্ৰাই ৰেপোৰ হাৰ ০.২৫ শতাংশ হ্ৰাস কৰিছিল। মুদ্ৰানীতি সমিতিৰ সিদ্ধান্তৰ মাত্ৰ দুমাহৰ পিছতে পুনৰ ৰেপো হাৰ ০.২৫ শতাংশ হ্ৰাস কৰে।
অৱশ্যে সূত্ৰৰ তথ্য অনুসৰি এই সিদ্ধান্ত অনিবাৰ্য আছিল। জিডিপি বৃদ্ধিৰ বাবে আগত আন কোনো পথ নাছিল। সেয়েহে ইতিবাচক পদক্ষেপ হিচাপে পুনৰ ৰেপ’ ৰেট হ্ৰাস কৰা হয় বুলি সদৰী কৰিছে।
সমগ্ৰ বিশ্বতে ক্ৰমাৎ বৃদ্ধি পোৱা বিত্তীয় অস্থিৰতাৰ প্ৰতি সঁহাৰি জনাই আৰ বি আই এ মুদ্ৰাস্ফীতিৰ বিৰুদ্ধে যুঁজিবলৈ ৰেপ’ ৰেট বৃহৎ পৰিমাণে বৃদ্ধি কৰিছিল। কিন্তু ২০২৩ চনৰ ফেব্ৰুৱাৰী মাহৰ পৰা ৰেপো ৰেট বৃদ্ধি হোৱা নাই। এইবাৰ দুবছৰৰ পাছত কমিছে ৰেপ’ ৰেট । ফলত নতুন গাড়ী বা ঘৰৰ ঋণ বা আনকি ব্যক্তিগত ঋণ লওঁতে ঋণ লোৱাসকলে লাভৱান হ’ব।