জুবিন-গৰিমাক লক্ষ্য কৰি ফেইচবুকত অশ্লীল পোষ্ট দিয়া ঘটনাৰ প্ৰতিক্ৰিয়া-ৰহস্য অব্যাহত; ২৪ ঘণ্টাৰ পিছতো আৰক্ষী ব্যৰ্থ দোষীক চিনাক্ত কৰাত
জুবিন আৰু গৰিমা গাৰ্গক লক্ষ্য কৰি ফেইচবুকত অতি অশ্লীল পোষ্ট দিয়া আৰু জুবিনক সন্মুখত পালেই হত্যা কৰাৰ ভাবুকি দিয়া ঘটনাটোৰ ৰহস্য এতিয়াও ভেদ হোৱা নাই। যদিও গৰিমা গাৰ্গে ৯ অক্তোবৰত দিচপুৰ থানাত এই সন্দৰ্ভত লুইত কুমাৰ বৰ্মন নামৰ ব্যক্তিজনৰ বিৰুদ্ধে এজাহাৰ দিছে তথাপি এই পৰ্য্যন্ত আৰক্ষীয়ে একো ব্যৱস্থা লোৱা নাই।
আনহাতে গৰিমা গাৰ্গৰ এজাহাৰৰ পিছতে সংগীত-চিনেমাৰ জগতখনৰ সৈতে জড়িত লুইত কুমাৰ বৰ্মনেও পল্টনবজাৰ থানাত তেওঁৰ একাউণ্ট কোনো দুষ্ট লোকে, বিশেষকৈ জুবিনৰ ফেনক্লাবৰ কোনোবাই, ব্যৱহাৰ কৰি অশ্লীল পোষ্টটো দিয়া বুলি অভিযোগ আনি তদন্তৰ দাবী জনাই এজাহাৰ দাখিল কৰিছে।
ইফালে এই বিষয়টো লৈ ছ’চিয়েল মিডিয়াতো তীব্ৰ প্ৰতিক্ৰিয়া অব্যাহত আছে। জুবিনৰ অনুৰাগীসকলে শীঘ্ৰে অভিযুক্ত লুইত কুমাৰ বৰ্মনক গ্ৰেপ্তাৰ কৰিবলৈ আৰক্ষীক দাবী জনাইছে। একেদৰে লুইত কুমাৰ বৰ্মনৰ বন্ধু-বৰ্গই লুইত কুমাৰ বৰ্মন নিৰ্দোষী, আৰক্ষীয়ে তদন্ত কৰি সোনকালে আচল অপৰাধীক ধৰিব লাগে বুলি দাবী জনাই আহিছে।
উল্লেখযোগ্য যে ৮ অক্তোবৰত লুইত কুমাৰ বৰ্মনে জুবিন আৰু গৰিমা গাৰ্গক লক্ষ্য কৰি অশ্লীল পোষ্ট দিয়া বুলি এটা স্ক্ৰীন শ্বট ৰাজহুৱা কৰে চাও জিতুমণি গগৈ নামৰ এজন জুবিন অনুৰাগীয়ে। অতি অশ্লীল ভাষা ব্যৱহাৰ কৰা পোষ্টটোত জুবিনক অবৈধ সন্তান বুলি কোৱা হৈছিল আৰু লগতে জুবিন-গৰিমাৰ সন্তানহীনতাৰ বিষয়েও অতি অশ্লীল কথা কোৱা হৈছিল। ইয়াৰ উপৰি জুবিনক সন্মুখত পালেই হত্যা কৰা হ’ব বুলিও ভাবুকি দিছিল।
“আমালৈ বিভিন্ন ধৰণৰ বাৰ্তা আহি থাকে বা আমাক লৈ বিভিন্নজনে বিভিন্ন পোষ্ট দি থাকে। কিন্তু এই পোষ্টটো অতি অশ্লীল আৰু ইয়াত জুবিনক হত্যাৰ ভাবুকি দিয়া হৈছে। আমি যিহেতু য’তে ত’তে ঘূৰি ফুৰো, গতিকে এইটো এটা ছিৰিয়াছ বিষয়। সেয়ে আৰক্ষীয়ে ইয়াৰ তদন্ত কৰাটো বিচাৰিছো।” ৯ অক্তোবৰত দিচপুৰ থানাত এজাহাৰ দি এইদৰে কয় গৰিমা গাৰ্গে।
আনহাতে অভিযোগ অস্বীকাৰ কৰিলেও লুইত কুমাৰ বৰ্মনে পূৰ্বেও আৰু সততে অশ্লীল ভাষা ব্যৱহাৰ কৰি পোষ্ট দিয়াৰ নজিৰ পোৱা যায়। লগতে তেওঁ জুবিনক পূৰ্বেও অভব্য ভাষাৰে আক্ৰমণ কৰাৰো নজিৰ অনেক আছে।
ইফালে চাও জিতুমণি গগৈয়ে নিজৰ ৱালৰ পৰা তেওঁ লুইত কুমাৰ বৰ্মনৰ টাইমলাইনৰ স্ক্ৰীন শ্বট বুলি দাবী কৰি দিয়া পোষ্টটো আঁতৰাই দিয়াটোৱেও ৰহস্যৰ সৃষ্টি কৰিছে।
মুঠতে এই ঘটনাটোৱে এতিয়া তীব্ৰ বিতৰ্কৰ লগতে সঁচা কোন মিছা কোন সেই বিষয়ে ধুঁৱলী-কুঁৱলীৰ পৰিৱেশ সৃষ্টি কৰিছে।