‘‘বঁটা বা সন্মানে মোক অধিক সৃষ্টিশীল হ’বলৈ ব্যধ্য কৰি তোলে, দায়বদ্ধ কৰি তোলে।’’ আজি ৰণাংগন সন্মান, ২০২০ গ্ৰহণ কৰি প্ৰথিতযশা সাহিত্যিক, চিন্তাবিদ, সাংবাদিক হোমেন বৰগোহাঞিয়ে এই অভিমত ব্যক্ত কৰে৷
আজি সাহিত্যিকগৰাকীৰ নিজা বাসভৱনত অনাড়ম্বৰপূৰ্ণ এক অনুষ্ঠানত এই বঁটা প্ৰদান কৰা হয়।
বঁটা গ্ৰহণ কৰি প্ৰথিতযশা সাহিত্যিক বৰগোহাঞিয়ে লগতে কয় যে মোৰ গৃহত ইমান লোকৰ পদধূলা পৰাটোৱেই মোৰ বাবে পুৰস্কাৰ, মই ধন্য হ’লো।
আজি ৰণাংগন সন্মান প্ৰদান অনুষ্ঠানত বৰগোহাঞিক পাটৰ চেলেং, গামোচা, শৰাই, প্ৰশস্তি পত্ৰ, গ্ৰন্থৰ টোপোলা, নগদ দহ হেজাৰ টকা আৰু এটি স্মাৰকেৰে সন্মানিত কৰা হয়৷
ৰণাংগন সন্মানৰ বিশেষ স্মাৰকটি প্ৰদান কৰে সুলেখক তথা ইংৰাজী সাহিত্যৰ পণ্ডিত ড॰ দয়ানন্দ পাঠকে। স্মাৰক প্ৰদান কৰি ড॰ পাঠকে কয় যে, এই বঁটাৰে হোমেন বৰগোহাঞি ধন্য হোৱা নাই, বঁটাটোহে ধন্য হ’ল। এনে এজন প্ৰসিদ্ধ ব্যক্তিক ৰণাংগন সন্মানৰ বাবে নিৰ্বাচিত কৰাটোৱেই উচিত পদক্ষেপ হিচাপে বিবেচিত হৈছে৷
ড০ পাঠকে লগতে কয় যে তেওঁ এগৰাকী নিজস্ব চিন্তা-চৰ্চা, ধ্যান-ধাৰণাৰে পৰিচালিত, কাৰো দ্বাৰা বিচলিত নোহোৱা চিন্তাবিদ। কেইবাটাও প্ৰজন্মক তেওঁ জ্ঞাতসাৰেই হওক, অজ্ঞতাসাৰেই হওক উদ্বুদ্ধ কৰি ৰাখিছে।
যোৱা বৰ্ষৰ এপ্ৰিল মাহতে এই বঁটা প্ৰদান কৰাৰ কথা আছিল যদিও ক’ভিড সৃষ্ট পৰিস্থিতিৰ লকডাউনৰ বাবে বঁটা প্ৰদান কাৰ্যসূচী স্থগিত ৰাখিব লগা হৈছিল।
প্ৰতি বছৰে অসমৰ শিল্প, সাহিত্য আৰু সমাজ জীৱনলৈ বিশেষ বৰঙণি আগবঢ়োৱা এজন বৰেণ্য ব্যক্তিক এই বঁটাৰে সন্মানিত কৰা হয়।
এই অনুষ্ঠানত ৰণাংগনৰ সম্পদনা উপদেষ্টা শিৱপ্ৰসাদ বৰা, সম্পাদক মিণ্টু দাস, পৰিচালন সম্পাদক সঞ্জীৱ বৰা, ষ্টাফ ৰিপ’টাৰদ্বয় চালাহউদ্দিন, দীপেন শইকীয়াও উপস্থিত থাকে।
