ভাৰতীয় ৰিজাৰ্ভ বেংকে শীৰ্ঘে বজাৰলৈ মুকলি কৰিব নতুন বিশ টকীয়া মূল্যৰ নোট। মহাত্মা গান্ধী ছিৰিজক অব্যাহত ৰাখি মুকলি হ’বলগীয়া নতুন বিশ টকীয়া নোটখনৰ ৰং হ’ব গ্ৰিনিচ হালধীয়া।
ৰিজাৰ্ভ বেংকে প্ৰকাশ কৰা অনুসৰি ভাৰতীয় সাংস্কৃতিক ঐতিহ্যক প্ৰতিফলিত কৰি নোটখনৰ এখন পৃষ্ঠত ঐতিহাসিক থাকিব ইলোৰা গুহাৰ প্ৰতিচ্ছবি।
যদিও নতুন বিশ টকীয়া নোটখনৰ মূল ৰং গ্ৰিনিচ হালধীয়া, তাৰ লগতে বিভিন্ন ধৰণৰ অলংকৰণ আৰু জ্যামিতিক বিন্যাসেৰে দুয়োটা পৃষ্ঠ সজোৱা হ’ব।
উল্লেখযোগ্য যে, ৰিজাৰ্ভ বেংকৰ তৰফৰ পৰা প্ৰকাশিত এটা প্ৰেছ বিজ্ঞপ্তিত উল্লেখ কৰা অনুসৰি বিমুদ্ৰাকৰণৰ পূৰ্বৰ বিশটকীয়া নোটসমূহো ভাৰতৰ অৰ্থনৈতিক বজাৰত আগৰ দৰেই চলি থাকিব।
আনহাতে, নতুন বিশ টকীয়া নোটখনৰ সোঁমাজত মহাত্মা গান্ধীৰ আলোকচিত্ৰৰ লগতে ‘দেৱনাগৰী’ আৰ্হিত ‘বিশ’ বুলি লিখা থকাৰ উপৰিও সোঁফালে অশোকস্তম্ভৰ আলোকচিত্ৰ সংযোজিত হ’ব।
তাৰোপৰি, মুকলি হ’বলগীয়া নতুন বিশ টকীয়া নোটখনৰ বাওঁফালে নোটখন ছপা কৰাৰ বছৰ উল্লেখ থকিব আৰু স্বচ্ছ ভাৰতৰ ল’গো, শ্লোগান সংযোজিত হ’ব।
