৪০ হেজাৰ টকা ভেটী লৈ থাকোতেই দুৰ্নীতি নিবাৰকৰ জালত পৰিল দিচপুৰৰ মণ্ডল ইণ্টাৰুদ্দিন আহমেদ
পুনৰ অসম আৰক্ষীৰ দুৰ্নীতি নিবাৰক শাখাৰ জালত পৰিল আন এজন দুৰ্নীতিপৰায়ণ বিষয়া। গোপন সূত্ৰৰ পৰা পোৱা খবৰৰ ভিত্তিত বুধবাৰে সন্ধিয়া দিচপুৰ ৰাজহ চক্ৰ বিষয়াৰ কাৰ্যালয়ত অভিযান চলাই চল্লিশ হেজাৰ টকা উৎকোচ লৈ থকাৰ সময়তে হাতে লোটে ধৰা পৰে লাট মণ্ডল ইণ্টাৰুদ্দিন আহমেদ।
উল্লেখ্য যে দুৰ্নীতি নিবাৰক শাখাৰ জালত পৰা ইণ্টাৰুদ্দিন আহমেদ নামৰ এই লাটমণ্ডলগৰাকীয়ে মাটি বিক্ৰীৰ অনুমতি দিয়াৰ নামত এগৰাকী মহিলাৰ পৰা ডেৰ লাখ টকা উৎকোচ বিচাৰিছিল। বুধবাৰে সন্ধিয়া মহিলাগৰাকীয়ে আগধন হিচাপে চল্লিশ হেজাৰ টকা আদায় দিয়াৰ সময়তে দলটোৱে দুৰ্নীতিগ্ৰস্ত মণ্ডলজনক গ্ৰেপ্তাৰ কৰে।
উল্লেখ্য যে মাটিৰ কামটো কৰি দিয়াৰ বাবদ লাটমণ্ডলগৰাকীয়ে মহিলাগৰাকীৰ পৰা উৎকোচ বিচৰা কাৰ্যত অতিষ্ঠ হৈয়ে সমগ্ৰ ঘটনা সন্দৰ্ভত ভুক্তভোগী মহিলাগৰাকীয়ে দুৰ্নীতি নিবাৰক শাখাত অভিযোগ দাখিল কৰিছিল। আৰু কালি মহিলাগৰাকীয়ে আগধন হিচাপে ৪০ হেজাৰ টকা দিওতে পূৰ্ব পৰিকল্পিতভাৱে কাৰ্যালয়ত উপস্থিত থকা ভিজিলেন্সৰ দলটোৱে বিষয়াজনক আটক কৰে।
ইফালে অভিযুক্ত মণ্ডলজনৰ বিৰুদ্ধে পঞ্জীয়ন কৰা ২২/২০১৮ নম্বৰ গোচৰৰ ভিত্তিতে দুৰ্নীতি নিবাৰক শাখাৰ দলে দুৰ্নীতিগ্ৰস্ত বিষয়া ইণ্টাৰুদ্দিন আহমেদক গ্ৰেপ্তাৰ কৰে।
আনহাতে গ্ৰেপ্তাৰৰ পাছতে লাটমণ্ডলজনৰ বাসগৃহত অভিযানকাৰী দলটোৱে তালাচী চলায়। আজি অভিযুক্তজনক বিশেষ আদালতত হাজিৰ কৰোৱা হ’ব বুলি জানিব পৰা গৈছে।
উল্লেখযোগ্য যে ১নং মঠঘৰীয়া, ২নং মঠঘৰীয়া, বীৰকুছি আৰু নুনমাটিৰ লাটমণ্ডল হিচাপে কৰ্মৰত আছিল ধৃত আহমেদ।