চামগুৰি সোনাৰিবালিত পথ দুৰ্ঘটনা; প্ৰাণ গ’ল ট্ৰাক চালকৰ

সোমবাৰে নিশা নগাঁও জিলাৰ চামগুৰি আৰক্ষী থানাৰ অন্তৰ্গত সোনাৰিবালিত সংঘটিত হোৱা এক মুখামুখি পথ দুৰ্ঘটনাত গুৰুতৰভাৱে আহত হোৱা এজন ট্ৰাক চালকে আজি চিকিৎসাধীন অৱস্থাত শেষ নিশ্বাস ত্যাগ কৰে।

নিহত চালক গৰাকীক কাৰ্ৱি আংলং জিলাৰ বকুলীয়া ঘাটৰ প্ৰয়াত মন মোহন কোচৰ পুত্ৰ দিলীপ কোচ (৩৫) বুলি চিনাক্ত কৰা হৈছে।

প্ৰাপ্ত তথ্য মতে কালি নিশা প্ৰায় ১০:৩০ বজাত সোনাৰিবালিৰ ৩৭ নং ৰাষ্ট্ৰীয় ঘাইপথত যোৰহাটৰ পৰা গুৱাহাটী অভিমুখী এ এছ ০১ ই চি ৯৩৭১ নম্বৰৰ ট্ৰাকখনে গুৱাহাটীৰ পৰা লখীমপুৰ অভিমুখে আহি থকা  এ এছ ০১ ই চি ৮৭৩৫ নম্বৰৰ মিনি ট্ৰাকখনত খুন্দা মৰাৰ ফলত উক্ত দুৰ্ঘটনাটো সংঘটিত হৈছিল।

দুৰ্ঘটনাটোত গুৱাহাটী অভিমুখী ট্ৰাকখনৰ চালক দিলীপ কোচ গুৰুতৰভাৱে আহত হয়।

পিছত ঘটনাস্থলীত চামগুৰি আৰক্ষী উপস্থিত হৈ আহত চালকজনক উদ্ধাৰ কৰি নগাঁও অসামৰিক চিকিৎসালয়লৈ প্ৰেৰণ কৰিছিল যদিও আজি দুপৰীয়া দিলীপে চিকিৎসাধীন অৱস্থাতে মৃত্যুবৰণ কৰে।