বিজেপি উত্থাপিত নাগৰিকত্ব বিধেয়কে ভাৰত-আলফা শান্তি আলোচনাৰ ‘আধাৰ’টোকে অগ্ৰাহ্য কৰা বুলি চৰ্চিত হৈ থকাৰ সময়তে চুক্তি স্বাক্ষৰৰ বিষয়টো কেন্দ্ৰীয় চৰকাৰৰ ওপৰত ‘নিৰ্ভৰ’ কৰিছে বুলি মঙলবাৰে মন্তব্য কৰিছে অনুপ চেতিয়াই।
“আলোচনা চূড়ান্ত পৰ্য্যায়ৰ দিশে আগবাঢ়িছে। এতিয়া চুক্তি স্বাক্ষৰিত হোৱাটো কেন্দ্ৰীয় চৰকাৰৰ ওপৰত নিৰ্ভৰ কৰিছে,” শান্তিৰ বল ভাৰত চৰকাৰলৈ ঠেলি নতুন দিল্লীত সাংবাদিকৰ আগত এই মন্তব্য আলফা নেতাজনৰ।
আলফাৰ দাবী চনদৰ তিনিটা প্ৰধান বিষয়তে বিজেপি উত্থাপিত বিধেয়কখনে প্ৰশ্নবোধক চিন অনাৰ ফলত চেতিয়াৰ এই মন্তব্য তাৎপৰ্য্যপূৰ্ণৰূপে পৰিগণিত হৈছে। ভাৰতীয় সংবিধানৰ আধাৰত অসমলৈ অধিক আত্ম নিয়ন্ত্ৰণৰ অধিকাৰ, অসম চুক্তিৰ আধাৰত বিদেশী বহিষ্কাৰ কৰা আৰু অসমত দ্বি নাগৰিকত্বৰ ব্যৱস্থা কৰা– এইকেইটা আলফাৰ দাবী চনদৰ প্ৰধান বিষয়।
আলফাৰ ‘সকলো দাবী যুক্তিপূৰ্ণ’ আৰু আলোচনা ‘চূড়ান্ত স্তৰ’ত থকা আলফাৰ প্ৰতিষ্ঠা দিৱসৰ দিনাই যোৱা ৭ এপ্ৰিলত গুৱাহাটীত মন্তব্য কৰিছিল কেন্দ্ৰীয় গৃ্হ ৰাজ্য মন্ত্ৰী কিৰেন ৰিজিজুৱে।
কিন্তু বৰ্তমান ৰাজ্য আৰু কেন্দ্ৰত শাসনাধীন বিজেপি চৰকাৰ বিধেয়কক লৈ ‘প্ৰতিশ্ৰুতিবদ্ধ’ হোৱাৰ বিপৰীতে আলফা নেতা অনুপ চেতিয়া, মৃণাল হাজৰিকা নেতৃত্বাধীন খিলঞ্জীয়া মঞ্চ বিদেশীক নাগৰিকত্ব প্ৰদানৰ ঘোৰ বিৰোধী। তেওঁলোকে ৰাজ্যজুৰি বিষয়টোক লৈ গণ আন্দোলনত আগভাগ লৈ আহিছে।
আলোচনাত পৰেশ বৰুৱাৰ ‘অংশগ্ৰহণ’ক লৈ অনুপ চেতিয়াই কয়, “তেওঁৰ সংগঠন বেলেগ। গতিকে তেওঁ আলোচনাত ভাগ লোৱা নোলোৱাটো ইয়াত বিষয় নহয়।”
শান্তি আলোচনাৰ মঙলবাৰৰ বৈঠকত ভাৰত চৰকাৰৰ মধ্যস্থতাকাৰী এ বি মাথুৰ, অসম চৰকাৰৰ প্ৰতিনিধি ৰাজ্যৰ আৰক্ষীৰ বিশেষ শাখাৰ বিশেষ সঞ্চালক প্ৰধান পল্লৱ ভট্টাচাৰ্য্য আৰু আলফাৰ অনুপ চেতিয়া, শশ চৌধুৰী, চিত্ৰবন হাজৰিকা আৰু ৰাজু বৰুৱাই অংশগ্ৰহণ কৰে।
