বঙাইগাঁও জিলাৰ ৩৪ নং অভয়াপুৰী উত্তৰ বিধান সভা সমষ্টিৰ অন্তৰ্গত সৃজনগ্ৰাম ৰাজহ চক্ৰৰ চক্ৰ তথা নাম্বাৰপাৰা চাকলা গাওঁ পঞ্চায়তৰ অন্তৰ্গত বাৰোঘড়ী-শৌলমাৰী গাৱঁৰ ৰাইজে এটা ৰাস্তাৰ বাবে দীৰ্ঘদিনে যমৰ যাতনা ভূগি আহিছে।
শৌলমাৰী প্ৰাথমিক প্ৰাথমিক বিদ্যালয়ৰ পৰা বাৰোঘড়ী হৈ দক্ষিণ নাম্বাৰপাৰা লৈ যোৱা একমাত্ৰ পথটোৰ জৰাজীৰ্ণ অৱস্থাৰ বাবে যমৰ যাতনাত ভুগিবলগীয়া হৈছে হাজাৰ হাজাৰ পথচাৰীৰ লগতে বিদ্যালয় মহাবিদ্যালয় ছাত্ৰ ছাত্ৰী সকলে।
ইফালে অতিকৈ কৃষি প্ৰধান অঞ্চলটোত উৎপাদিত কৃষিজাত সামগ্ৰী সমূহ পথৰ দুৰৱস্থাৰ বাবেই সময় মতে বজাৰলৈ নিব নোৱাৰি উচিৎ মূল্যৰ পৰা বঞ্চিত হবলগীয়া হৈছে কৃষকসকল।
বিভিন্ন সময়ত পঞ্চায়ত সভানেত্ৰী ৰৌচনাৰা খাতুন জিলা পৰিষদৰ সদস্য খায়ৰুল ইছলাম, স্থানীয় বিধায়ক আব্দুল বাতিন খন্দকাৰৰ লগতে জিলা প্ৰশাসনকো অৱগত কৰিছে যদিওঁ কোনো সুফল নোপোৱাৰ অভিযোগ উত্থাপন কৰিছে স্থানীয় ৰাইজে ।
আনহাতে, বিধায়ক আব্দুল বাতিন খন্দকাৰে চৌদিশে পথৰ আধাৰশিলা স্থাপনৰ কাম আৰম্ভ কৰি বা আধাৰশিলা স্থাপন কৰি সমষ্টিত ব্যপক চৰ্চা লাভ কৰিছে যদিওঁ শৌলমাৰী, বাৰোঘড়ী, কোকিলা প্ৰথম খণ্ড সংযোগী অতিকৈ পুৰণি ৰাস্তা টোৰ প্ৰতি কোনো গুৰুত্ব নিদিয়াৰ বাবে বিভিন্ন ধৰণে বিধায়কক সমালোচনা কৰা পৰিলক্ষিত হৈছে।
সাংসদ আব্দুল খালেকে শৌলমাৰী, নাম্বাৰপাৰা প্ৰথম, দ্বিতীয় আৰু তৃতীয় খণ্ডৰ ৰাইজৰ ভোট লৈ ৰাম ঠগন দিয়াৰ অভিযোগ উত্থাপন কৰে । একেদৰে জিলা পৰিষদৰ সদস্য খাইৰুল ইছলামেও কোনো গুৰুত্ব নিদিয়াৰ অভিযোগ উত্থাপন হৈছে ।
প্ৰতিজন নেতাই এই অঞ্চলৰ ৰাইজৰ সমস্যাৰ প্ৰতি অকণো গুৰুত্ব নিদিয়াৰ বাবে ক্ষোভিত হৈ পৰিছে ৰাইজ। কাৰণ ৰাস্তাটোৰে কেইবাখনো গাঁৱৰ বিদ্যালয় মহাবিদ্যালয়ৰ ছাত্ৰ ছাত্ৰী, বিভিন্ন খেতিয়কৰ উৎপাদিত শস্য সমূহ বজাৰলৈ লৈ যাবলগীয়া হয়।
ৰাস্তাৰ দুৰৱস্থাৰ বাবেই সকলো ক্ষেত্ৰতে সমস্যাৰ সন্মুখীন হৈছে অঞ্চলস্থ ৰাইজ। ইফালে বৰৈচালাৰ পৰা কীৰ্তনপাৰা লৈ যোৱা ৰাস্তাৰ একেই অৱস্থা। ঠেলি ঠেলি পাৰ কৰিবলগীয়া হৈছে চাৰিচকীয়া বাহন। প্ৰতি দিনে প্ৰায় ৭-৮ খন বিদ্যলয়ৰ ছাত্ৰ ছাত্ৰী অহা যোৱা কৰিবলগীয়া হয় এই পথটোৰে। সেয়ে উপায়ন্তৰ ৰাইজে অসমৰ মূখ্যমন্ত্ৰীৰ পকী পথ নিৰ্মাণ আঁচনিৰ অধীনত নাইবা যিকোনো আচনিঁৰ জৰিয়তে পথটো উন্নত কৰি ৰাইজ তথা ছাত্ৰ ছাত্ৰী যাতায়ত সুচল কৰি দিয়ে তাৰ বাবে অসমৰ মূখ্যমন্ত্ৰী ডঃহিমন্ত বিশ্ব শৰ্মাৰ লগতে সংশ্লিষ্ট বিভাগীয় কৰ্তৃপক্ষক ৰাইজে অনুৰোধ জনাইছে ।
এতিয়া ৰাইজৰ অনুৰোধৰ প্ৰতি চৰকাৰ তথা বিভাগীয় কৰ্তৃপক্ষই কেনে গুৰুত্ব প্ৰদান কৰে সেয়া সময়ত লক্ষণীয় হব ।
