বাক্সা জিলাৰ তামুলপুৰ আৰক্ষী থানাৰ অন্তৰ্গত কাউলিৰ ভাৰত-ভূটান সীমান্তৰ বিষ্ণুপুৰত আজি সংঘটিত হোবা দিন ডকাইতিৰ ঘটনাই আতংকিত কৰি তুলিছে গাঁৱবাসীক।
জানিব পৰা মতে, আজি দিনৰ ১২-০০ বজাত বিষ্ণুপুৰ নিবাসী কাজল দে’ নামৰ লোকজনৰ ঘৰত কোনো নথকাৰ সুযোগ লৈ বাইকত অহা এজন আচিনাক্ত দুৰ্বৃত্তই প্ৰৱেশ কৰি লুটপাত আৰম্ভ কৰে।
সেই সময়তে কাজল দে’ৰ পত্নী অনুৰাণী দে’ পথাৰত গৰু এৰাল দি নিজ গৃহত উপস্থিত হৈ কোনো অচিনাক্ত লোকে ঘৰৰ ভিতৰত থকা সা-সামগ্ৰী উলট পালট কৰি থকা পৰ্যবেক্ষণ কৰে।
লগে লগে মহিলা গৰাকীয়ে চিঞৰ বাখৰ কৰাত দুৰ্বৃজনে অস্ত্ৰ দেখুৱাই মহিলাজনীক মৃত্যুৰ ভাবুকি দিয়ে যদিও মহিলাজনী ঘৰৰ পৰা পলায়ন কৰিবলৈ সক্ষম হয়।
মহিলা গৰাকীয়ে পলায়ন কৰাৰ সময়তে দুৰ্বৃত্তজনেও ঘটনাস্থলীৰ পৰা পলায়ন কৰে।
দুৰ্বৃত্তজনে কাজল দে’ নামৰ লোক জনৰ বাসগৃহত প্ৰৱেশ কৰি লক্ষাধিক টকাৰ সোণৰ আ-অলংকাৰৰ লগতে নগদ ৮০,০০০ টকা লৈ উধাও হয়।
সমগ্ৰ ঘটনাক কেন্দ্ৰ কৰি সম্প্ৰতি বৃহত্তৰ কাউলী অঞ্চলত এক চাঞ্চল্যকৰ পৰিৱেশে বিৰাজ কৰিছে।
ঘটনাক লৈ কুমাৰীকাটা আৰক্ষী চকীৰ ভাৰপ্ৰাপ্ত বিষয়াই তদন্ত অব্যাহত ৰাখিছে যদিও এতিয়ালৈ দুৰ্বৃত্তজনক কৰায়ত্ত কৰিবলৈ সক্ষম হোৱা নায়।
