অধিনায়ক হৈয়ে খেলপথাৰত ৰোহিতক ‘অপমান’ হাৰ্দিকৰ; মুখ বন্ধ কৰি সহি ৰ’ল হিটমেন! ভিডিঅ’ চাই ক্ষুব্ধ নেটিজেন

মুম্বাইৰ জাৰ্চি পিন্ধি হাৰ্দিক পাণ্ডিয়াৰ আই পি এলৰ নেতৃত্বত অভিষেক ঘটাটো সুখকৰ নহ’ল। মুম্বাই ইণ্ডিয়ানছে প্রথমখন খেলত তেওঁলোকৰ পুৰণি ফ্ৰেঞ্চাইজি গুজৰাট টাইটানছৰ হাতত পৰাস্ত হৈ প্রতিযোগিতাৰ অভিযান আৰম্ভ কৰে৷ আৰু নেতৃত্বৰ অভিষেকত ৰোহিতৰ সৈতে খেলপথাৰত তেওঁৰ সম্পৰ্কৰ কেমিষ্ট্ৰী কেনেকৈ বজাই ৰখা হয়, সেয়া লক্ষ্যণীয় আছিল।

কিন্তু হাৰ্দিকৰ কাণ্ড দেখি স্তম্ভিত হৈ পৰে ক্ৰিকেট জগত! হাৰ্দিকে ৰোহিতক নিজৰ ইচ্ছাৰ বিৰুদ্ধে কাৰ্যতঃ বাউণ্ডেৰী লাইনৰ কাষত ফিল্ডিং কৰিবলৈ কয়। ৰোহিতে সাধাৰণতে বৃত্তৰ ভিতৰতে ফিল্ডিং কৰে। তেওঁ বাউণ্ডেৰী লাইনৰ কাষত ফিল্ডিং কৰি আছে, ক্ৰিকেট খেলপথাৰত এনে দৃশ্য বিৰল। দেওবাৰৰ হাই ভল্টেজ মেচখনত সেইটোৱেই ঘটিল।

লগতে পঢ়কঃ IPL 2024: খেল দেখুৱালে ৰোহিতে, অভিষেকতে ব্যৰ্থ অধিনায়ক হাৰ্দিক; মুম্বাইক হৰুৱালে গীলৰ গুজৰাটে

ৰোহিতৰ নেতৃত্বত মুম্বাই ইণ্ডিয়ানছৰ হৈ একেৰাহে ৬ বছৰ খেলিছিল হাৰ্দিকে। প্ৰাক্তন অধিনায়কগৰাকীৰ ফিল্ডিং পজিচনৰ বিষয়ে তেওঁ ভালদৰেই জানে। গুজৰাট টাইটানছৰ ইনিংছৰ শেষ অভাৰত ৰোহিতে বৃত্তৰ ভিতৰলৈ খোজ দিছিল। হাৰ্ডিকে কাৰ্যতঃ ধমক দি হিটমেনক ডিপলৈ পঠিয়াই দিয়ে। সেই সময়ত জেৰাল্ড ক’টজীয়ে বল কৰি আছিল।

এই কথা ক্ৰিকেট মহলত বেয়াকৈ চৰ্চা হৈছে। ক্ৰিকেট অনুৰাগীয়ে হাৰ্দিকৰ বিৰুদ্ধে পোনপটীয়াকৈ ছচিয়েল মিডিয়াত ক্ষোভ প্ৰকাশ কৰিছে।

খেলখনত মুম্বাইৰ পৰাজয়ৰ পিছত ইৰফান পাঠানে হাৰ্দিকক থকাসৰকা কৰে। দেৱাল্ড ব্ৰেভিছৰ সৈতে লক্ষ্য অতিক্ৰমৰ যুঁজত নামি ৰোহিতে মুম্বাইক সহজ জয়ৰ সন্ধান দি গৈছিল। ৰোহিত আউট হোৱাৰ পিছতে ক্ৰমান্বয়ে মেচখনৰ পৰা মুম্বাই আঁতৰি যায়।

ৰোহিতে বেটেৰে চমক দেখুৱাইছিল যদিও বেট আৰু বলেৰে হাৰ্দিক সম্পূৰ্ণ বিফল হৈছিল। পাৱাৰ প্লে’ত বুমৰাহক আক্রমণলৈ নানি নিজেই বল কৰিবলৈ আহি প্রথম দুটা অভাৰত ২০ ৰান দিয়ে৷ পিছত শেষত বেটিং কৰিবলৈ নামি ফিনিচিং টাচ দিয়াতো ব্যৰ্য হয়। উমেশ যাদৱৰ বলত আউট হৈ যায়।