গুজৰাট টাইটানছ বনাম হাৰ্দিক পাণ্ডিয়াৰ মুম্বাইৰ খেলখনত জয়লাভ কৰিলে নতুন অধিনায়ক শুভমান গীলে। ছাই সুদৰ্শন (৪৫)ৰ লগতে তেওঁৱো দলৰ হৈ যিদৰে গুৰুত্বপূৰ্ণ ৰান (৩১) কৰিলে, সেইদৰে অধিনায়ক হিচাপেও যুৱ অধিনায়কগৰাকীয়ে দাঙি ধৰিলে উজ্জ্বল প্ৰদৰ্শন।
হোলী উৎসৱৰ প্ৰাকক্ষণত আহমেদাবাদৰ নৰেন্দ্ৰ মোডী ষ্টেডিয়ামত জয়ৰ ফাকু উৰুৱালে শুভমনে। মুম্বাইৰ প্ৰাক্তন অধিনায়ক ৰোহিত শৰ্মা (৪৩) আৰু দেৱাল্ড ব্ৰেভিছ (৪৬)ৰ যুঁজখন কামত নাহিল। অন্তিম অভাৰত ৰুদ্ধশ্বাস যুঁজত ৬ ৰানত পৰাস্ত হয় মুম্বাই।
গুজৰাট টাইটানছৰ বিৰুদ্ধে হাই ভল্টেজ মেচত টছত জয়লাভ কৰি মুম্বাই ইণ্ডিয়ানছৰ নতুন অধিনায়ক হাৰ্দিক পাণ্ডিয়াই প্ৰথমে বলিং কৰাৰ সিদ্ধান্ত লয়। দেওবাৰে দৰ্শকেৰে ভৰি পৰিছিল মোডী ষ্টেডিয়াম।
আই পি এলৰ যিকোনো মেচ আকৰ্ষণীয়। এইবাৰৰ আই পি এলত গুজৰাট আৰু মুম্বাইৰ মাজত অধিনায়ক সলনিৰ সন্দৰ্ভত এলানি নাটক দেখা গৈছে। গুজৰাটৰ সফল অধিনায়কগৰাকীয়ে মুম্বাইৰ দায়িত্ব লৈছে। ফলত ৰোহিতে অধিনায়কৰ পদৰ পৰা আঁতৰিছে। আনহাতে, হাৰ্দিকৰ বাবেই গীল গুজৰাটৰ নতুন অধিনায়ক। ইয়াতকৈ ডাঙৰ নাটকীয় মুহূৰ্ত কি আছে?
অধিনায়কৰ ‘লিডিং ফ্ৰম ফ্ৰন্ট’ ষ্টাইলত মুম্বাইৰ হৈ বলিং মুকলি কৰে হাৰ্দিকে। যদিও সফল নহ’ল। মেচখনত তেওঁ তিনিটা অভাৰত ৩০ ৰান দিয়ে। বিনিময়ত এটাও উইকেট নাপালে। যশপ্ৰীত বুমৰাহ মুম্বাইৰ ত্ৰাণকৰ্তা হৈ পৰিল। যদিও হাৰ্দিকে এটা মূৰত ৰান দিছিল, কিন্তু আনটো মূৰত বুমৰাহ অহাত গুজৰাটৰ ৰানৰ গতি লেহেমীয়া হৈছিল। তেওঁ চাৰি অভাৰত ১৪ ৰানত তিনিটা উইকেট দখল কৰে। স্পীনাৰ পীয়ুষ চাওলাই যোগ্য সংগ দিয়ে। তিনি অভাৰত ৩১ ৰান দি এটা উইকেট দখল কৰে।
গুজৰাটৰ হৈ ৰিদ্ধিমান সাহা আৰু শুভমনে সামগ্ৰিকভাৱে ভাল আৰম্ভণি কৰিছিল। ১৫টা বলত ১৯ ৰান সংগ্ৰহ কৰি আউট হয় উইকেটকীপাৰ সাহা। পিছত ছাই সুদৰ্শনে গুজৰাটৰ দায়িত্ব মূৰ পাতি লয়। তেওঁ ৪৫ ৰান সংগ্ৰহ কৰে। অধিনায়ক গীলে গুৰুত্বপূৰ্ণ ৩১ ৰান সংগ্ৰহ কৰে। শেষত ৰাহুল টিওটিয়াই পোন্ধৰটা বলত ২২ ৰান কৰি গুজৰাটক ২০ অভাৰত ১৬৮ ৰানলৈ লৈ যায়।
টী-২০ৰ আক্ৰমণাত্মক শৈলীত মুম্বাইয়ে ১২০টা বলত ১৬৯ ৰানৰ লক্ষ্যও অতিক্ৰম কৰিব নোৱাৰিলে। আৰম্ভণিতে দুটা উইকেটৰ পতনৰ বাহিৰে মেচখন মুম্বাইৰ ফালেই ঢাল খাইছিল। অধিনায়কত্ব হেৰুৱালেও আকৰ্ষণীয় ফৰ্মত ৰোহিত। সাৱলীলভাৱেই ৰাণ কৰিছিল ৰোহিতে। ভাৰতীয় অধিনায়কগৰাকীৰ সৈতে আছিল ইমপেক্ট ক্ৰিকেটাৰ হিচাপে নমা ডেৱাল্ড ব্ৰেভিছ।
ৰোহিতে ২৯টা বলত ৪৩ ৰানৰ উজ্জ্বল ইনিংছ খেলিছিল যদিও তেওঁ ছাই কিশোৰৰ বলত এল বি ডব্লিউ হয়। আনহাতে, ব্ৰেভিছেও ৪৬ ৰান সংগ্ৰহ কৰি পেভিলিয়নলৈ উভতি যায়। ইয়াৰ ফলত সহজ লক্ষ্যও হঠাতে কঠিন হৈ পৰে। অৱশ্যে কৃতিত্ব দিবই লাগিব গুজৰাটৰ অধিনায়ক আৰু তেওঁৰ শৃংখলিত বলিং বাহিনীক।
সংক্ষিপ্ত স্কোৰঃ
গুজৰাট টাইটানছ : ১৬৮/৬ (ছাই সুদৰ্শন-৪৫, শুভমন গীল-৩১)
মুম্বাই ইণ্ডিয়ানছঃ ১৬২/৯ (ৰোহিত-৪৩, ব্ৰেভিছ-৪৬) ।
