ইডেন গাৰ্ডেনছ আৰু বিৰাট কোহলী। এদিনীয়া ক্ৰিকেটত শতকৰ ব্যৱধান ১৪ বছৰ। বিৰাট কোহলীৰ আন্তঃৰাষ্ট্ৰীয় কেৰিয়াৰৰ প্ৰথম শতকটো আহিছিল এই ইডেন গাৰ্ডেনতে। ২০০৯ চনত শ্ৰীলংকাৰ বিৰুদ্ধে তেওঁ এদিনীয়াত শতক অৰ্জন কৰিছিল। সেই ইডেনতে আহিল অভিলেখ সৃষ্টিকাৰী ৪৯ সংখ্যক এদিনীয়া শতক।
দক্ষিণ আফ্ৰিকাৰ বিৰুদ্ধে বিৰাটে খেলিলে ১২১ বলত ১০১ ৰানৰ অপৰাজিত ইনিংছ। তেওঁ এটা ডাঙৰ শতক কৰিলে যদিও ইনিংছত এটাও ছয় মৰা নাই! কিছু আচৰিত। অধিনায়ক ৰোহিত শৰ্মা অৱশ্যে আচৰিত হোৱা নাই। বৰঞ্চ এইটোৱেই দলৰ আশা। চেঞ্চুৰিয়ান কোহলীৰ বিষয়ে সেই ব্যাখ্যাই দিলে ৰোহিতে।
টছত জয়ী হৈ ৰোহিতে বেটিং কৰিবলৈ লয়। তেওঁ খেলপথাৰত নামিয়েই বিধ্বংসী আৰম্ভণি কৰে। অ’পেনাৰ দুজন ঘূৰি অহাৰ লগে লগে বিৰাটে ইনিংছৰ গুৰি ধৰে। আৰম্ভণিৰ পৰা শেষলৈকে ক্ৰীজত থাকি গঢ়ে চেঞ্চুৰীৰ ইনিংছ। বাকীসকলৰ সহায়ত ভাৰতে ৩২৬ ৰানৰ বিশাল স্ক’ৰ সংগ্ৰহ কৰে।
ৰোহিতে কয়, ‘যোৱা তিনিখন মেচৰ কথা ভাবি চাওকচোন, আমাৰ খেলৰ শৈলী সলনি হৈছে৷ এই মেচত বিৰাটে পৰিস্থিতি অনুযায়ী খেলাৰ প্ৰয়োজন আছিল। আমাৰ বলিঙৰ ওপৰত চকু আছিল, বলাৰসকলে সঠিক ঠাইত বল পেলাওক। বাকীখিনি পিটচৰ সহযোগিতা।
মাষ্টাৰ ব্লাষ্টাৰ শচীনৰ কেৰিয়াৰৰ ৪৯ সংখ্যক শতকৰ অভিলেখ স্পৰ্শ কৰিছে বিৰাট কোহলীয়ে। কিং কোহলীলৈ শুভেচ্ছাৰে বৰ্ষণ হৈছে। প্ৰধানমন্ত্ৰী নৰেন্দ্ৰ মোদীয়েও বিৰাট কোহলীক অভিনন্দন জনায়। যাৰ অভিলেখ ভংগ কৰিছে সেই অভিলেখকাৰী কিংবদন্তি শচীনেও প্ৰশংসাৰ উপচাই দিছে কোহলীক।
এই বিশ্বকাপ বিৰাটৰ। তেওঁক কেন্দ্ৰ কৰিয়েই যেন খেলি আছে বাকী দলটোৱে। ইডেনত দক্ষিণ আফ্ৰিকাৰ বিৰুদ্ধে বিৰাটৰ সৈতে শ্ৰেয়াছ, সূৰ্য, জাডেজাই এক সফল যুটী বান্ধে। মিডল অৰ্ডাৰৰ প্ৰদৰ্শনত আপ্লুত ৰোহিত শৰ্মা।পুনৰ বলিং আক্ৰমণৰ প্ৰশংসা কৰিবলৈ যেন শব্দই বিচাৰি নাপালে অধিনায়কে।
