গুৱাহাটী ৰে’ল আৰক্ষীৰ নিয়মীয়া তালাচী অভিযানত আজি গুৱাহাটী ৰে’ল ষ্টেচনৰ পৰা চোৰাং সোণ উদ্ধাৰ কৰা হয়।ৰাতিপুৱা আৰক্ষীয়ে ষ্টেচনত তালাচী চলাই ১ নং প্লেটফৰ্মৰ পৰা উদ্ধাৰ কৰে অবৈধ ভাবে সৰবৰাহ কৰিব বিচৰা সোণখিনি।
এতিয়ালৈ আৰক্ষীয়ে উদ্ধাৰ কৰা সোণখিনিৰ লগত কোনো ব্যক্তিক কৰায়ত্ত কৰিবলৈ সক্ষম হোৱা নাই যদিও ষ্টেচনত থকা চিচি টিভি ফুটেজৰ ভিত্তিত ইয়াৰ ওপৰত তদন্ত চলাই আছে। ষ্টেচনত গৰাকীবিহীন ভাবে পৰি থকা এটা ট্ৰলী বেগৰ ওপৰত তহলদাৰী ৰে’ল আৰক্ষীৰ সন্দেহ ওপজাত ভালকৈ বেগটোৰ তালাচী চলাওতে সোণখিনি ওলাই পৰে।
সোণখিনিৰ ওজন ১.২৯৮ কিলোগ্ৰাম হ’ব বুলি ৰে’ল আৰক্ষীয়ে প্ৰকাশ কৰে।আনহাতে, নামনিমুৱা ৰাজধানী এক্সপ্ৰেছত সোণখিনি উজনি অসমৰফালৰ পৰা কোনোবা অবৈধ সৰবৰাহকাৰীয়ে লৈ আহিছিল বুলি সন্দেহ প্ৰকাশ কৰা হৈছে। অতি চতুৰ ভাবে সোণখিনি ট্ৰলী বেগটোৰ চকা হিচাপে ব্যাৱহাৰ কৰি নিয়াৰ চেষ্টা কৰিছিল অপৰাধী সকলে কিন্তু ধৰা পৰাৰ ভয়ত ষ্টেচনত এৰি থৈ যায় বেগটো।
