মোহন ভাগৱত আৰু আৰ এছ এছক প্ৰশংসা সমাজবাদী পাৰ্টীৰ সাংসদ আফজল আনছাৰীৰ।
শনিবাৰে তেওঁ ৰাষ্ট্ৰীয় স্বয়ংসেৱক সংঘ অৰ্থাৎ আৰ এছ এছৰ মুৰব্বী মোহন ভাগৱতক মুকলিকৈ প্ৰশংসা কৰে। তেওঁ কয় যে মানুহে ভাগৱতৰ পৰা শিকিব লাগে।
শনিবাৰে ৰাইফল ক্লাবত বিদ্যুৎ সমিতিৰ বৈঠকৰ পিছত সংবাদ মাধ্যমৰ সৈতে কথা পাতিছিল সাংসদ আফজল আনছাৰীয়ে। আনছাৰীয়ে কয় যে আৰ এছ এছৰ তিনিদিনীয়া শিবিৰৰ অন্তত মোহন ভাগৱতে উপলব্ধি কৰিছে যে দেশত ঐক্য আৰু ভাতৃত্ববোধৰ প্ৰয়োজন আছে আৰু ঘৃণাৰ ব্যৱসায় বন্ধ কৰিব লাগে।
প্ৰশংসা কৰি সাংসদগৰাকীয়ে কয়, “হিন্দু ধৰ্মক প্ৰতিনিধিত্ব কৰিবলৈ পৃথিৱীত আৰ এছ এছতকৈ উত্তম মঞ্চ নাই। ভাগৱতে কৈছে যে প্ৰতিটো মছজিদ আৰু সমাধিস্থলত শিৱলিঙক বিচাৰিলে দেশ দুৰ্বল হ’ব। সংঘৰ মুৰব্বীৰ পৰা একাংশ লোকে পৰামৰ্শ লোৱা উচিত।”
সাংসদগৰাকীয়ে আৰু কয়, “ভাগৱতৰ কথাক মই আদৰণি জনাইছো। সংঘৰ মুৰব্বীগৰাকীৰ বক্তব্যক আদৰণি জনোৱাৰ বাবে আন ধৰ্মৰ ধৰ্মগুৰুসকলকো আহ্বান জনোৱা হৈছে।”
বিজেপিৰ ডাঙৰ ডাঙৰ নেতাসকলৰ নাম নোলোৱাকৈয়েও মন্তব্য কৰে এছ পি সাংসদগৰাকীয়ে। তেওঁ কয়, “যিজনৰ নিজৰ পৰিয়াল নাই, তেওঁ আনৰ পৰিয়ালৰ যন্ত্ৰণা কেনেকৈ বুজিব।”
আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ ওপৰত ৫০ শতাংশ শুল্ক আৰোপ কৰা সন্দৰ্ভত শনিবাৰে এক বিবৃতি প্ৰদান কৰে সাংসদ আফজল আনছাৰীয়ে। তেওঁ কয় যে ট্ৰাম্পৰ শুল্কৰ বাবে বস্ত্ৰ কল বন্ধ হৈ আছে। ইয়াৰ বাবে বস্ত্ৰ উদ্যোগত ৩০ লাখ লোক নিবনুৱা হৈ পৰিব। কেন্দ্ৰীয় চৰকাৰৰ বৈদেশিক নীতিক লৈ তেওঁ প্ৰশ্ন উত্থাপন কৰে। লগতে পহলগাম আক্ৰমণৰ কথাও উল্লেখ কৰে।
পহলগাম কাণ্ডৰ কথা উল্লেখ কৰি আফজল আনছাৰীয়ে কয় যে আৰম্ভণি ভাল আছিল, কিন্তু শেষটো লজ্জাজনক। ট্ৰাম্পে আমেৰিকাত বহি যুদ্ধবিৰতি ঘোষণা কৰিছিল আৰু ভাৰত আৰু পাকিস্তানে মানি লৈছিল।
বৈদেশিক নীতিৰ ওপৰত প্ৰশ্ন উত্থাপন কৰি তেওঁ কয় যে বিশ্বৰ কোনো এখন দেশেই মুকলিকৈ ভাৰতৰ সপক্ষে কথা কোৱা নাই। আদানীক বচাবলৈ চৰকাৰ মৌন বুলি অভিযোগ উত্থাপন কৰে সাংসদগৰাকীয়ে।
