যোৰহাট জিলাৰ টীয়কৰ বৃহত্তৰ কলিয়াপানী যুৱ মঞ্চৰ উদ্যোগত সোমবাৰে কলিয়াপানীত আয়োজিত দিবা-নৈশ ক্ৰিকেট প্ৰতিযোগিতাৰ চূড়ান্ত খেলৰ প্ৰাক মুহূৰ্তত টীয়ক প্ৰেছ ক্লাৱ আৰু কন্ঠশিল্পী ভৃগু কাশ্যপৰ মাজত অনুষ্ঠিত প্ৰীতি খেলত ভৃগু কাশ্যপৰ হৈ দলত অংশগ্ৰহণ কৰা মৰিয়নীৰ বিধায়ক ৰূপজ্যোতি কুৰ্মীয়ে প্ৰথমে বলিং কৰি নিজৰ দক্ষতা প্ৰদৰ্শন কৰে।
অৱশ্যে বলিঙত উইকেট দখল কৰিব নোৱাৰিলেও মিতব্যয়ী আছিল কুৰ্মী।
বিপৰীতে দলৰ হৈ বেটিং মুকলি কৰিবলৈ অহা কুৰ্মীয়ে এটা দিশত নিজ দক্ষতাৰে খোপনি পুতি খেলৰ শেষলৈকে অপৰাজিত হৈ থাকি নিজ দলৰ বেটচমেনৰ খহনীয়া প্ৰতিৰোধ কৰাৰ লগতে ৰাণৰ সংখ্যা বৃদ্ধি কৰিবলৈ সক্ষম হৈছিল।
কিন্তু প্ৰেছ ক্লাৱৰ ৮৬ ৰাণৰ টাৰ্গেট অতিক্ৰম কৰাত ব্যৰ্থ হয়।
খেলৰ শেষত নিজৰ পাৰদৰ্শিতা সন্দৰ্ভত সাংবাদিকে সোধা প্ৰশ্নৰ উত্তৰত তাৎপয্যপূৰ্ন মন্তব্য কৰে ৰূপজ্যোতি কুৰ্মীয়ে।
ৰূপজ্যোতি কুৰ্মীৰ মন্তব্যৰে ইংগিত দিয়ে যে বৰ্তমানৰ কংগ্ৰেছৰ বিপৰ্যয়ৰ সময়ত মৰিয়নীত কুৰ্মীয়ে একক ভাবে দাঙি ধৰিব কংগ্ৰেছৰ পতাকা। লগতে অহা নিৰ্বাচনতো দলক সুৰক্ষা প্ৰদান কৰিব বুলি তেওঁ মন্তব্য কৰে।
