ৰাছিয়াই কৃষ্ণসাগৰৰ আকাশত আমেৰিকা যুক্তৰাষ্ট্ৰৰ চোৰাংচোৱা ড্ৰোন ধ্বংস কৰা পাইলটসকলক পুৰস্কৃত কৰিব। শুকুৰবাৰে ৰাছিয়াৰ প্ৰতিৰক্ষা মন্ত্ৰালয়ে এই কথা ঘোষণা কৰিছে।
ৰাছিয়াৰ প্ৰতিৰক্ষা মন্ত্ৰী ছেৰ্গেই ছুইগুৱে পাইলটসকলক প্ৰশংসা কৰি কয় যে মস্কোলৈ উৰণৰ বাবে নিষিদ্ধ কৰা অঞ্চলটোত ড্ৰোন উৰা প্ৰতিহত কৰাৰ বাবে পাইলটসকলক ৰাষ্ট্ৰীয় সন্মান প্ৰদান কৰা হ’ব।
প্ৰতিৰক্ষা মন্ত্ৰীগৰাকীয়ে লগতে কয় যে মস্কোৱে আৰোপ কৰা নিষেধাজ্ঞাসমূহ “আন্তৰ্জাতিক নিয়ম অনুসৰি” আছিল।
লগতে পঢ়ক: ডিজিটেল সুৰক্ষা আইনৰ অধীনত গ্ৰেপ্তাৰ বাংলাদেশী অভিনেত্ৰী মাহিয়া মাহী
ইপিনে, আমেৰিকা যুক্তৰাষ্ট্ৰই অভিযোগ কৰিছে যে মঙলবাৰে ৰাছিয়াৰ যুদ্ধবিমানৰ সৈতে সংঘৰ্ষত এটা আমেৰিকা যুক্তৰাষ্ট্ৰৰ চোৰাংচোৱা ড্ৰোন ধ্বংস হৈছে।
আমেৰিকা যুক্তৰাষ্ট্ৰ আৰু ৰাছিয়াৰ মাজত উত্তেজনা অব্যাহত থকাৰ মাজতে আমেৰিকা যুক্তৰাষ্ট্ৰৰ বিদেশ বিভাগে ৱাশ্বিংটনত ৰাছিয়াৰ ৰাষ্ট্ৰদূতক মাতি পঠিয়াই প্ৰতিবাদ কৰিছে।
অৱশ্যে, ৰাছিয়াৰ যুদ্ধবিমানৰ সৈতে আমেৰিকাৰ ড্ৰোনৰ পোনপটীয়া সংঘৰ্ষৰ অভিযোগ অস্বীকাৰ কৰিছে ৰাছিয়াই।
লগতে পঢ়ক: অশান্ত ম্যানমাৰৰ বৌদ্ধ মন্দিৰত তিনিজন বৌদ্ধ ভিক্ষুসহ ২২ জন লোকক গুলীয়াই হত্যা
দেশখনে দাবী কৰিছে যে আমেৰিকা যুক্তৰাষ্ট্ৰৰ ড্ৰোনক ক্ৰিমিয়াৰ সীমান্তৰ ওচৰলৈ আহিবলৈ বাধা দিয়া হৈছিল। সেই সময়ত, ক্ষিপ্ৰ টাৰ্ণ ল’বলৈ চেষ্টা কৰোঁতে ড্ৰোনখন দুৰ্ঘটনাগ্ৰস্ত হৈছিল বুলি ৰাছিয়াই দাবী কৰিছিল।
