দেশখনৰ ডিজিটেল সুৰক্ষা আইনৰ অধীনত দাখিল কৰা এটা গোচৰত বাংলাদেশৰ অভিনেত্ৰী মাহিয়া মাহীক গ্ৰেপ্তাৰ কৰা হৈছে।
শনিবাৰে দুপৰীয়া প্ৰায় ১২:০০ বজাত গাজীপুৰ মেট্ৰ’পলিটান পুলিচৰ (জিএমপি) সদস্যসকলে হজৰত শ্বাহজালাল আন্তঃৰাষ্ট্ৰীয় বিমানবন্দৰৰ পৰা অভিনেত্ৰী মাহিয়া মাহীক গ্ৰেপ্তাৰ কৰে। গাজীপুৰ মেট্ৰ’পলিটান আৰক্ষী আয়ুক্ত মোল্লা নজৰুল ইছলামে বিষয়টো নিশ্চিত কৰিছে।
ইয়াৰ পূৰ্বে শুকুৰবাৰে জিএমপিৰ বাসন আৰক্ষী থানাৰ উপ-পৰিদৰ্শক (এছআই) মহম্মদ ৰোকন মিয়াই ডিজিটেল সুৰক্ষা আইনৰ অধীনত মাহী আৰু তেওঁৰ স্বামীৰ বিৰুদ্ধে গোচৰ ৰুজু কৰে।
গোচৰটোত ফেচবুক লাইভত মানহানিকৰ তথ্য প্ৰচাৰ কৰি আইন-শৃংখলাৰ অৱনতি ঘটাৰ অভিযোগ উত্থাপিত হৈছে।
ইয়াৰ উপৰিও, এগৰাকী স্থানীয় বাসিন্দা ইছমাইল হোছেইনে ভূমি দখলৰ অভিযোগত তেওঁলোকৰ বিৰুদ্ধে আন এটা গোচৰ ৰুজু কৰিছিল।
