সন্তোষ ট্ৰফী : আজি প্ৰথম মেচত শক্তিশালী পাঞ্জাৱৰ বিৰুদ্ধে অৱতীৰ্ণ হ’ব অসম
৮ এপ্ৰিল অৰ্থাৎ সোমবাৰৰ পৰা আৰম্ভ হোৱা ২০১৯ বৰ্ষৰ সন্তোষ ট্ৰফী ৰাষ্ট্ৰীয় ফুটবল প্ৰতিযোগিতাৰ চূড়ান্ত পৰ্বৰ খেলত আজি প্ৰথমবাৰৰ বাবে অৱতীৰ্ণ হ’ব অসম। অসমৰ প্ৰথম প্ৰতিদ্বন্দ্বী ঘৰুৱা দল পাঞ্জাৱ।
পাঞ্জাৱৰ গুৰুনানক ষ্টেডিয়ামৰ লগতে ৰাজ্যৰ অন্য প্ৰান্তৰ বিভিন্ন স্থানত অনুষ্ঠিত হ’ব লগীয়া এই প্ৰতিযোগিতাখনত অসমে স্থান লাভ কৰিছে ‘বি’ গ্ৰুপত। গ্ৰুপত অসমৰ স’তে আছে কৰ্ণাটক, মহাৰাষ্ট্ৰ, পাঞ্জাৱ আৰু ছিকিম।
অসমে পৰৱৰ্তী মেচ কেইখন খেলিব ক্ৰমে ১১ এপ্ৰিলত মহাৰাষ্ট্ৰ, ১৩ এপ্ৰিলত ছিকিম, ১৫ এপ্ৰিলত কৰ্ণাটকৰ বিৰুদ্ধে।
প্ৰশিক্ষক সুবীৰ দে’ৰ তত্ত্বাৱধানত যোৱা অসম দলটোৰ অধিকাংশ খেলুৱৈয়ে প্ৰথমবাৰৰ বাবে এনেধৰণৰ ৰাষ্ট্ৰীয় পৰ্যায়ৰ প্ৰতিযোগিতাত অংশ গ্ৰহণ কৰিছে। উল্লেখ্য যে আইজলত অনুষ্ঠিত উত্তৰ-পূব মণ্ডলৰ প্ৰাথমিক পৰ্বৰ মেচত অসমে শক্তিশালী মণিপুৰৰ লগতে অন্যান্য ৰাজ্যক পৰাস্ত কৰাৰ পাছৰে পৰা প্ৰশিক্ষকগৰাকী দলটোক লৈ যথেষ্ট আত্মবিশ্বাসী বুলি জানিবলৈ দিয়ে।
প্ৰতিযোগিতাখনৰ বাবে যোৱা অসম দলটো এনেধৰণৰ গ’লৰক্ষক— বিশু চাহু, কুন্দন ব্ৰহ্ম, ৰক্ষণ বিভাগত দ্বীপেন মৰাণ, ছাম্পা ৰংমেই, শ্যাম নাৰ্জাৰী, হিতেশ্বৰ নাৰ্জাৰী, শুভক্ষণ ৰাভা, উদিত বৰা, মিডফিল্ডত শ্যামজ্যোতি পেগু, পুলুং দৈমাৰী, ৰাকেব বসুমতাৰী, চিৰণ দ্বীপ মৰাণ, সাগৰ হাংলিম্বু, জিয়ানচুন ৰংমেই, ফ’ৰৱাৰ্ডত চিতু বসুমতাৰী, মিলন বসুমতাৰী, তুল্য দাস, আক্ৰাং নাৰ্জাৰী, ঈশাক চাংমা আৰু বিষ্ণু বৰদলৈ।