কেন্দ্ৰীয় মানৱ সম্পদ উন্নয়ন মন্ত্ৰালয়ৰ নেশ্যনেল ইনষ্টিটিউশ্যনেল ৰেংকিং ফ্ৰেমৱৰ্ক, ২০১৯ৰ ‘ইণ্ডিয়া ৰেংকিং ২০১৯’ত দেশৰ শ্ৰেষ্ঠ আভিযান্ত্ৰিক প্ৰতিষ্ঠানসমূহৰ ভিতৰত গুৱাহাটী আই আই টিয়ে সপ্তম স্থান লাভ কৰিছে।
আনহাতে, দেশৰ দহটা স্থানৰ শ্ৰেষ্ঠ উচ্চ শিক্ষাৰ প্ৰতিষ্ঠান হিচাপে স্বীকৃতি লাভ কৰিছে আই আই টি গুৱাহাটীয়ে। নেশ্যনেল ইনষ্টিটিউশ্যনেল ৰেংকিং ফ্ৰেমৱৰ্ক, ২০১৯ৰ তালিকাত দেশৰ শ্ৰেষ্ঠ বাছনিপ্ৰাপ্ত শীৰ্ষ দহখন উচ্চ শিক্ষাৰ প্ৰতিষ্ঠানৰ ভিতৰত আই আই টি গুৱাহাটীক নৱম স্থান দিয়া হৈছে।
আই আই টি গুৱাহাটীৰ ইয়াৰ ফেচবুক পেইজত ই লাভ কৰা স্থান সম্পৰ্কে কোৱা হৈছে : ’’ সামগ্ৰিকভাৱে আই আই টি গুৱাহাটীয়ে ২০১৮ চনত লাভ কৰা দ্বাদশ স্থানৰ পৰা ২০১৯ত নৱম স্থানলৈ উন্নীত হৈছে।‘’
ৰাষ্ট্ৰপতি ৰামনাথ কোবিন্দে সোমবাৰে নতুন দিল্লীৰ বিজ্ঞান ভৱনত এই তালিকাখন মুকলি কৰে।
ইপিনে, তালিকাত দেশৰ সামগ্ৰিকভাৱে শ্ৰেষ্ঠ উচ্চ শিক্ষা প্ৰতিষ্ঠানৰ ভিতৰত শীৰ্ষস্থানত আছে আই আই টি, মাদ্ৰাজ। ভাৰতীয় বিজ্ঞান প্ৰতিষ্ঠান (আই আই এছ চি), বেংগালুৰুৱে দ্বিতীয় আৰু আই আই টি দিল্লীয়ে তৃতীয় শ্ৰেষ্ঠ উচ্চ শিক্ষাৰ প্ৰতিষ্ঠানৰ স্বীকৃতি লাভ কৰিছে।
আনহাতে, বিশ্ববিদ্যালয় শাখাত আই আই এছ চি-বেংগালুৰু, অভিযান্ত্ৰিক শাখাত আই আই টি, মাদ্ৰাজ, মেনেজমেণ্ট শাখাত আই আই এম বেংগালুৰু, চিকিৎসা বিজ্ঞান শাখাত এইমছ, নতুন দিল্লী আৰু ফাৰ্মাচী শাখাত দিল্লীৰ জামিয়া হামডৰ্ডে শ্ৰেষ্ঠত্বৰ দিশত শীৰ্ষ স্থান লাভ কৰিছে।