বিদ্যাৰ অধিস্তাত্ৰী দেৱী সৰস্বতীৰ পূজাক কেন্দ্ৰ কৰি ব্যাপক তৎপৰতাত দেখা পোৱা গৈছে সমগ্ৰ ৰাজ্যৰ ছাত্ৰ-ছাত্ৰী, শিক্ষক-শিক্ষয়ত্ৰী তথা মৃৎ-শিল্পী সকলৰ মাজত।
ৰাজ্যৰ একাংশ শিক্ষানুষ্ঠানত বুধবাৰে পুৱাৰে পৰা বাকদেৱীৰ পূজা উলহ-মালহৰ মাজেৰে অনুষ্ঠিত কৰাৰ বিপৰীতে নগাঁও জিলাৰ চামগুৰিৰ একাংশ শিক্ষানুষ্ঠানত বাকদেৱীৰ পূজা বৈদিক ৰীতি-নীতিৰে বৃহস্পতিবাৰৰ দিনটোতো সমাপন কৰিবলৈ উৎকণ্ঠিত হৈ পৰিছে ছাত্ৰ-ছাত্ৰী আৰু শিক্ষক-শিক্ষয়ত্ৰীসকল।
সমান্তৰালভাৱে বুধবাৰে দিনটোতো সমূহ মৃৎশিল্পী অধিক ব্যস্ত হৈ পৰিছে চামগুৰিৰ গটঙাত থকা পুৰণি তিনিখনকৈ মূৰ্তিকাৰৰ প্ৰতিষ্ঠানত। সৰস্বতীৰ মৃন্ময় মূৰ্তি সমূহত অন্তিম পৰশ দিয়াত ব্যস্ত মৃৎশিল্পী সকল।
গটঙাৰ মৃৎশিল্পী সকলে জানিবলৈ দিয়া মতে, বিগত বছৰ সমূহৰ তুলনাত এই বছৰ ‘কা’ বিৰোধী আন্দোলনে সীমিত কৰিছে ৰাইজৰ উৎসৱ উদযাপনৰ প্ৰৱণতা, যাৰ বাবে বহু কম সংখ্যক সৰস্বতী মূৰ্তিহে নিৰ্মাণ কৰিছে প্ৰতিষ্ঠান কেইখনত। গটঙাত থকা এই মূৰ্তিকাৰৰ প্ৰতিষ্ঠান কেইখনে বিগত প্ৰায় চাৰি দশক ধৰি বিভিন্ন দেৱ-দেৱীৰ মূৰ্তি নিৰ্মাণ কৰি আহিছে।
প্ৰথম বাৰৰ বাবে এই বছৰ দুটাকৈ দিনত সৰস্বতীৰ পূজা উদযাপন কৰিবলৈ পাই আন এক সুকীয়া অভিজ্ঞতাৰ সাক্ষী হৈছে ৰাজ্যৰ বিভিন্ন প্ৰান্তৰ ছাত্ৰ-ছাত্ৰী লগতে বীণাপাণিৰ ছাত্ৰ-ছাত্ৰী আৰু ৰাইজ।
