বি ডব্লিউ এফ বিশ্ব চেম্পিয়নশ্বিপ ২০২৫: পদক নিশ্চিত কৰি ছেমিত প্ৰৱেশ সাত্বিক-চিৰাগ যুটিৰ; বিদায় ল’লে সিন্ধুৱে

পেৰিছত চলি থকা বিশ্ব বেডমিণ্টন চেম্পিয়নশ্বিপ ২০২৫ত ভাৰতীয় তাৰকা শ্বাটলাৰ সাত্ৱিক ছাইৰাজ ৰেংকিৰেডী আৰু চিৰাগ শ্বেট্টী যুটিয়ে দৰ্শনীয় প্ৰদৰ্শনৰে ছেমি ফাইনেলত প্ৰৱেশ কৰি পদক নিশ্চিত কৰিছে। পুৰুষৰ ডাবলছ শাখাত বিশ্বৰ তৃতীয় স্থানত থকা এই যুটিয়ে কোৱাৰ্টাৰ ফাইনেলত মালয়েছিয়াৰ এৰন চিয়া আৰু ছ’হ ৱুই ইয়িকক ২১-১২, ২১-১৯ ব্যৱধানত পৰাস্ত কৰি এই সাফল্য অৰ্জন কৰে। ইয়াৰ লগে লগে ভাৰতে ২০১১ চনৰ পৰা এই প্ৰতিযোগিতাত দেখুৱাই অহা পদকৰ ধাৰাবাহিকতা অক্ষুণ্ণ ৰাখিছে, আৰু সাত্বিক-চিৰাগ যুটিৰ কমেও ব্ৰঞ্জ পদক নিশ্চিত হৈ পৰিছে।

এই জয়ৰ লগে লগে সাত্বিক-চিৰাগে পেৰিছ অলিম্পিক ২০২৪ৰ কোৱাৰ্টাৰ ফাইনেলত আৰু ২০২২ চনৰ বিশ্ব চেম্পিয়নশ্বিপৰ ছেমি ফাইনেলত মালয়েছিয়ান যুটিটোৰ বিৰুদ্ধে হোৱা পৰাজয়ৰ প্ৰতিশোধো লয়। ৪৩ মিনিট স্থায়ী এই মেচত ভাৰতীয় যুটিয়ে প্ৰথম গেমত প্ৰভাৱশালী প্ৰদৰ্শন দেখুৱাই ২১-১২ ব্যৱধানত জয় লাভ কৰে, আৰু দ্বিতীয় গেমতো ২১-১৯ ব্যৱধানত জয়ী হয়। উল্লেখ্য যে মালয়েছিয়ান যুটিটোৰ বিৰুদ্ধে ১৫খন মেচত এয়া সাত্বিক-চিৰাগৰ চতুৰ্থ জয়।

২০২২ চনতো এই যুটিয়ে বিশ্ব চেম্পিয়নশ্বিপৰ ছেমি ফাইনেলত প্ৰৱেশ কৰিছিল যদিও এৰন চিয়া আৰু ছ’হ ৱুই ইয়িকৰ বিৰুদ্ধে পৰাজিত হৈ ব্ৰঞ্জ পদকত সন্তুষ্ট হ’বলগীয়া হৈছিল। এইবাৰ ছেমি ফাইনেলত সাত্বিক-চিৰাগে বিশ্বৰ ১১ নম্বৰ স্থানত থকা চীনৰ লি ইউ আৰু বো ইয়াং চেন যুটিৰ সন্মুখীন হ’ব। এই মেচত জয়ী হ’লে তেওঁলোকে স্বৰ্ণ বা ৰূপৰ পদকৰ বাবে ফাইনেলত প্ৰৱেশ কৰিব।

অৱশ্যে এই সাফল্যৰ বিপৰীতে ভাৰতৰ আন এগৰাকী তাৰকা পি ভি সিন্ধুৱে প্ৰতিযোগিতাত যাত্ৰা সমাপ্ত কৰিছে। মহিলা এককৰ কোৱাৰ্টাৰ ফাইনেলত সিন্ধুৱে ইণ্ডোনেছিয়াৰ পুত্ৰী কুছুমা ৱাৰ্ডানীৰ বিৰুদ্ধে ১৪-২১, ২১-১৩, ১৬-২১ ব্যৱধানত পৰাজিত হয়। এই পৰাজয়ৰ লগে লগে বিশ্ব চেম্পিয়নশ্বিপত ৫টা পদক জয় কৰা সিন্ধুৰ ষষ্ঠ পদকৰ আশা নিৰ্বাপিত হয়। সিন্ধু আৰু ৱাৰ্ডানীৰ মাজত হোৱা পূৰ্বৰ মেচসমূহত দুয়োগৰাকীৰ হেড-টু-হেড ২-২ আছিল, কিন্তু এইবাৰ ৱাৰ্ডানীয়ে জয় লাভ কৰি সিন্ধুক বাহিৰ কৰে।

ভাৰতৰ বাবে এই প্ৰতিযোগিতাত সাত্বিক-চিৰাগ যুটিৰ সাফল্যই গৌৰৱ কঢ়িয়াই আনিছে, আৰু ছেমি ফাইনেলত তেওঁলোকৰ পৰৱৰ্তী মেচত সকলোৰে দৃষ্টি নিবদ্ধ হৈ ৰৈছে।