অসম জাতীয় পৰিষদৰ সভাপতি লুৰীণজ্যোতি গগৈয়ে কেন্দ্ৰীয় গৃহমন্ত্ৰী অমিত শ্বাহৰ শেহতীয়া অসম ভ্ৰমণক ব্যৰ্থ, নিৰস আৰু হতাশাজনক বুলি আখ্যা দিছে। ডিব্ৰুগড়ত এক সংবাদমেলত ভাষণ দি গগৈয়ে অমিত শ্বাহক কটাক্ষ কৰি কয় যে, তেওঁ সংগতিবিহীন, অবাস্তৱ আৰু মিথ্যাচাৰেৰে পৰিপূৰ্ণ কথা কৈ অসম এৰি গৈছে।
অজাপৰ নেতাগৰাকীয়ে কয় যে, অমিত শ্বাহৰ পৰা উত্তৰ বিচাৰি ৰাইজৰ হৈ দলে মুঠ ১১টা প্ৰশ্ন উত্থাপন কৰিছিল। এই প্ৰশ্নসমূহ বিজেপিয়ে ২০১৪, ২০১৬, ২০১৯, ২০২১ আৰু ২০২৪ চনৰ নিৰ্বাচনত অসমবাসীক দিয়া প্ৰতিশ্ৰুতিৰ সৈতে জড়িত। আশা কৰা হৈছিল যে, অসম ভ্ৰমণ কালত তেওঁ এই প্ৰশ্নসমূহৰ উত্তৰ দিব। কিন্তু দুৰ্ভাগ্যজনকভাৱে গুৱাহাটীত তিনিখন ৰাজহুৱা সভাত ভাষণ দিলেও এটা প্ৰশ্নৰো উত্তৰ নিদিয়া অভিযোগ কৰে লুৰীণজ্যোতি গগৈয়ে।
তেওঁ কয়, “দেশৰ গৃহমন্ত্ৰীয়ে এটাও প্ৰশ্নৰ উত্তৰ নিদিলে। দেশত এনে এটা ব্যৱস্থা চলি আছে যি ব্যৱস্থাত প্ৰধানমন্ত্ৰী, গৃহমন্ত্ৰী, মুখ্যমন্ত্ৰী আদিয়ে নিজৰ মুখেৰে দিয়া প্ৰতিশ্রুতি সমূহৰ প্ৰতিও দায়বদ্ধ নহয়।”
অনুপ্ৰৱেশকাৰীৰ প্ৰসংগত গগৈয়ে কেন্দ্ৰীয় গৃহমন্ত্ৰীক কটাক্ষ কৰি কয় যে, অমিত শ্বাহে ঘোষণা কৰিছে যে ৰাজ্যৰ মুখ্যমন্ত্ৰীয়ে অসমৰ ১,২৬,০০০ একৰ মাটি অবৈধ অনুপ্ৰৱেশকাৰীৰ পৰা মুক্ত কৰিছে। কিন্তু আমি বিচাৰো যে, এই বৃহৎ পৰিমাণৰ মাটিত বসবাস কৰা অনুপ্ৰৱেশকাৰীসকলক কি কৰা হ’ল? ৪ লাখ ১৫ হাজাৰ ৮০০ বিঘা মাটিত থকা এই মানুহসকলক বহিষ্কাৰ কৰা হ’ল নে নাই?
তেওঁ লগতে কয়, “গৃহমন্ত্ৰীৰ ভাষাত সেই অবৈধ অনুপ্ৰবেশকাৰীসকলক ৰাজকোষৰ ধনেৰে ভাৰতৰ ভূমিখণ্ডৰ অসমৰ ভৌগলিক চাৰি সীমাৰ ভিতৰতেই পুনৰ সংস্থাপিত কৰিছে। এতিয়া গৃহমন্ত্ৰীয়ে আমাক জনাওক, অবৈধ অনুপ্ৰৱেশকাৰী বুলি জনাৰ পিছতো সেই সকলক বহিস্কাৰ নকৰি ৰাজকোষৰ ধনেৰে অসমৰ মাটিত পুনৰ সংস্থাপন কৰাটো ৰাষ্ট্ৰদ্ৰোহ হয় নে নহয়।”
গগৈয়ে অভিযোগ কৰে যে, উচ্ছেদিত মাটিৰ অধিক সংখ্যক অংশৰ পৰা অসমৰ জনজাতীয় খিলঞ্জীয়া মানুহকো উচ্ছেদ কৰা হৈছে। তেনেস্থলত কেন্দ্ৰীয় গৃহমন্ত্ৰীয়ে অসমৰ জনজাতীয় ভূমিপুত্ৰসকলক অবৈধ অনুপ্ৰৱেশকাৰী আখ্যা দি অক্ষমনীয় অপৰাধ কৰিছে।
ইয়াৰ লগতে লুৰীণজ্যোতি গগৈয়ে দাবী কৰে যে, অমিত শ্বাহ আৰু হিমন্ত বিশ্ব শৰ্মাই শিলসাঁকো, লখিমপুৰৰ পবা, ফুকনহাট, নগাঁৱৰ মিকিৰ বামুনি, কাজিৰঙাৰ সমীপৰ ইংলে পথাৰ আৰু হাতীখুলি, গুৱাহাটীৰ ওচৰৰ আমচাং আদি অঞ্চলৰ উচ্ছেদিত খিলঞ্জীয়া ৰাইজৰ ওচৰত ক্ষমা বিচাৰিব লাগে।
