কেন্দ্ৰীয় চৰকাৰে গৃহীত কৰা তিনিখন কৃষি আইনক কেন্দ্ৰ কৰি এতিয়াও অব্যাহত আছে বিতৰ্ক।
কৃষকসকলে যোৱা দুমাহ ধৰি দিল্লীৰ সীমান্তৰ লগতে ৰাজ্যৰ আন আন প্ৰান্তত আন্দোলন কৰি আছে।
আন্দোলনৰত কৃষক আৰু চৰকাৰৰ মাজত কেইবাৰো আলোচনা অনুষ্ঠিত হৈছে যদিও এতিয়ালৈকে কোনো সমাধান সূত্ৰ ওলোৱা নাই।
উল্লেখ্য যে উচ্চতম ন্যায়ালয়ে যোৱা ১২ জানুৱাৰিত বিতৰ্কিত কৃষি আইন ৰূপায়নত স্থগিতাদেশ প্ৰদান কৰাৰ লগতে এই বিষয়টো সমাধানৰ বাবে এখন চাৰিজনীয়া উচ্চস্তৰীয় সমিতি গঠন কৰি দিছিল।
সৰ্বোচ্চ ন্যায়ালয়ে গঠন কৰি দিয়া সমিতিৰ অন্যতম সদস্য অনিল ঘণৱটে আজি কয় যে উচ্চতম ন্যায়ালয়ৰ নিৰ্দেশনা আছে যে আমি সকলো কৃষক সংগঠন (সমৰ্থনকাৰী আৰু বিৰোধী)ৰ নেতাসকলৰ মতামত জানি এখন প্ৰতিবেদন প্ৰস্তুত কৰি উচ্চতম ন্যায়ালয়লৈ প্ৰেৰণ কৰিব লাগিব।
তেওঁ লগতে অহা ২১ জানুৱাৰিৰ ৰাতিপুৱা ১১ বজাত কৃষকসকলৰ সৈতে সমিতিখনে প্ৰথমখন বৈঠকত মিলিত হ’ব বুলি জনায়।
যিসকল সংগঠন বৈঠকত উপস্থিত থাকিব নোৱাৰে সেইসকলৰ মন্তব্য ভিডিঅ’ কনফাৰেন্সিঙৰ জৰিয়তে লোৱা হ’ব।
ইয়াৰ উপৰি ঘনৱটে কয়, ‘যদি চৰকাৰে আমাৰ সৈতে কথা পাতিব বিচাৰে, তেন্তে আমি ইয়াক স্বাগতম জনাম। আমি চৰকাৰৰ কথা শুনিম। আটাইতকৈ ডাঙৰ প্ৰত্যাহ্বান হৈছে আন্দোলনকাৰী কৃষকসকলক সৈমান কৰা আৰু আমাৰ সৈতে কথা কোৱা, আমি আমাৰ স্তৰত সৰ্বশ্ৰেষ্ঠ প্ৰয়াস কৰিম’।
