পাঁচজনীয়া ন্যায়াধীশৰ সাংবিধানিক বিচাৰপীঠে গ্ৰহণ কৰিব সমলিংগ বিবাহৰ স্বীকৃতি বিচাৰি কৰা আবেদনৰ শুনানি
দেশত সমলিংগ বিবাহৰ সাংবিধানিক স্বীকৃতি বিচাৰি উচ্চতম ন্যায়ালয়ত দাখিল কৰা আবেদন পাঁচজনীয়া ন্যায়াধীশৰ সাংবিধানিক বিচাৰপীঠৰ শুনানিৰ বাবে প্ৰেৰণ কৰিছে উচ্চতম ন্যায়ালয়ে। এই পাঁচজনীয়া ন্যায়াধীশৰ সাংবিধানিক বিচাৰপীঠে ১৮ এপ্ৰিলৰ পৰা বিষয়টোৰ শুনানি আৰম্ভ কৰিব।
সোমবাৰে ছলিচিটৰ জেনেৰেল তুষাৰ মেহতাই কেন্দ্ৰৰ হৈ যুক্তি প্ৰদৰ্শন কৰি কয় যে প্ৰেম, প্ৰকাশ আৰু পছন্দৰ স্বাধীনতাৰ অধিকাৰ ইতিমধ্যে ৰক্ষা কৰা হৈছে আৰু সেই অধিকাৰত কোনেও হস্তক্ষেপ কৰা নাই। কিন্তু ইয়াৰ অৰ্থ বিবাহৰ অধিকাৰ প্ৰদান কৰা নহয় বুলি তেওঁ লগতে কয়।
মেহতাই লগতে কয় যে সমলিংগ লোকৰ মাজত স্বীকৃতিপ্ৰাপ্ত কাৰ্য হিচাপে বিবাহ হোৱাৰ লগে লগে দত্তক লোৱাৰ ক্ষেত্ৰত প্ৰশ্ন উত্থাপন হ’ব। আৰু সেয়েহে সংসদে শিশুটিৰ মনোবিজ্ঞান মূল্যায়ন কৰিব লাগিব।
ছলিচিটৰ জেনেৰেল মেহতাৰ এই যুক্তিৰ প্ৰতি সহাঁৰি জনাইআমুখ ন্যায়াধীশ চন্দ্ৰচূড়ে সমকামী দম্পতীৰ দত্তক সন্তান সমকামী যে হ’বই লাগিব, সেয়া ক’ব নোৱাৰি বুলি মন্তব্য কৰে।
মুখ্য ন্যায়াধীশ চন্দ্ৰচুড়ে লগতে কয়, “আমাৰ মতে সংবিধানৰ এ ১৪৫(৩)ৰ প্ৰতি যথাযথ লক্ষ্য ৰাখি এই আদালতৰ পাঁচজন ন্যায়াধীশৰ বিচাৰপীঠে উত্থাপিত বিষয়সমূহ সমাধান কৰিলে উপযুক্ত হ’ব। সেয়ে আমি বিষয়টোক সংবিধানৰ বিচাৰপীঠৰ সন্মুখত ৰখাৰ নিৰ্দেশ দিওঁ।”
উল্লেখ্য যে, কেন্দ্ৰীয় চৰকাৰে দেওবাৰে সমলিংগ বিবাহৰ স্বীকৃতিৰ বিৰোধিতা কৰি সমলিংগ বিবাহৰ ধাৰণা ভাৰতীয় পৰম্পৰাৰ বিৰুদ্ধে বুলি উল্লেখ কৰিছিল। চৰকাৰে লগতে সমকামী দম্পতীৰ মাজত বিবাহক স্বীকৃতি দিলে ভাৰতীয় পৰিয়ালৰ ধাৰণাটোৰ পৰা বিচ্যুতি ঘটিব বুলি উল্লেখ কৰিছিল।
আজি উচ্চতম ন্যায়ালয়ে বিষয়টোক প্ৰাথমিক গুৰুত্বসম্পন্ন বিষয় বুলি উল্লেখ কৰে আৰু এই গোচৰৰ ৰায়ে সমাজৰ ওপৰত বৃহৎ প্ৰভাৱ পেলাব বুলি মন্তব্য কৰে। পাঁচজনীয়া বিচাৰপীঠে এই বিষয়ৰ শুনানি গ্ৰহণ কৰাৰ সময়ত আদালতৰ কাৰ্যবিধি লাইভ ষ্ট্ৰীম কৰা হ’ব।