বিহাৰৰ ভোটাৰ তালিকাৰ ব্যাপক সংশোধনক লৈ নিৰ্বাচন আয়োগ আৰু ৰাজনৈতিক দলসমূহৰ মাজত সৃষ্টি হোৱা পৰিৱেশ। এই ঘটনা ‘দুৰ্ভাগ্যজনক’ বুলি উল্লেখ কৰিছে উচ্চতম ন্যায়ালয়ে। ভোটাৰ তালিকাত নাম নথকা লোকৰ আবেদনৰ বাবে আয়োগে নিৰ্ধাৰণ কৰা সময়সীমা বৃদ্ধিৰ বাবে এছ’চিয়েশ্যন ফৰ ডেম’ক্ৰেটিক ৰিফৰ্মে আবেদন দাখিল কৰিছিল। ন্যায়াধীশ সূৰ্যকান্ত আৰু ন্যায়াধীশ জয়মাল্য বাগচীৰ বিচাৰপীঠে শুনানিৰ সময়ত কয় যে এই সন্দৰ্ভত আপত্তি উত্থাপনৰ অন্তিম তাৰিখ ১ ছেপ্টেম্বৰ হ’লেও নিৰ্বাচন আয়োগে আবেদনখন এতিয়াও গ্ৰহণ কৰিব।
বিশেষজ্ঞৰ এটা অংশই কয় যে নিৰ্বাচন আয়োগে স্বচ্ছ আৰু নিৰপেক্ষভাৱে কাম কৰিব লাগে। এইটোৱেই হৈছে চিৰন্তন নিয়ম। দেশৰ গণতান্ত্ৰিক আন্তঃগাঁথনি নিৰ্মাণৰ দায়িত্বও তেওঁলোকৰ কান্ধত। যদি বিৰোধীয়ে কোনো আবেদন লৈ আয়োগৰ কাষ চাপে তেন্তে বিষয়টোৰ ওপৰত বিষয়াসকলে গুৰুত্ব দিব। অৱশ্যে যোৱা কেইবছৰমানৰ পৰা ছবিখনৰ বহু পৰিৱৰ্তন হৈছে। নিৰ্বাচন আয়োগৰ ভূমিকাক লৈ বিৰোধী দল একেবাৰেই সুখী নহয়। মন কৰিবলগীয়া যে ২০২৪ চনৰ লোকসভা নিৰ্বাচনৰ সময়ত বিৰোধী দলৰ নেতা ৰাহুল গান্ধীয়েও এই সন্দৰ্ভত সৰৱ হৈ উঠিছিল। শেহতীয়াকৈ বিহাৰত এছ আই আৰ বা বিশেষ তীব্ৰ সংশোধনী আৰম্ভ হোৱাৰ পিছৰে পৰা নিৰ্বাচন আয়োগ আৰু ‘ভাৰত’ মিত্ৰজোঁটৰ মাজত সংঘাতই তুংগত উপনীত হৈছে। ভোটাৰ তালিকা সংশোধনৰ প্ৰক্ৰিয়াত স্বচ্ছতাৰ অভাৱ হোৱা বুলি বিৰোধীয়ে অভিযোগ উত্থাপন কৰিছে। আয়োগে কেন্দ্ৰত শাসকীয় দল বিজেপিৰ হৈ কাম কৰি আছে। বিৰোধীৰ বক্তব্যক নিৰ্বাচনী বিষয়াসকলেও খণ্ডন কৰাৰ লগতে একাংশ বিশ্লেষকে কয় যে প্ৰকৃততে আয়োগক বিজেপিৰ মুখপাত্ৰ হিচাপে ব্যৱহাৰ কৰি আছে। নিৰ্বাচন আয়োগ আৰু ৰাজনৈতিক দলসমূহৰ মাজত থকা এই আস্থাহীনতাক উচ্চতম ন্যায়ালয়ে দুখজনক বুলি গণ্য কৰিছে।
